ব্ৰহ্মপুত্ৰৰ তলেৰে নিৰ্মাণ হ’ব তিনিতৰপীয়া সুৰংগ

ডিজিটেল ডেস্ক: ভাৰত চৰকাৰে প্ৰথমবাৰৰ বাবে ব্ৰহ্মপুত্ৰৰ তলেৰে  পথ তথা ৰে’ল সুৰংগ নিৰ্মাণৰ পৰিকল্পনা কৰিছে। ভাৰত চৰকাৰে আনুমানিক ৭,০০০ কোটি টকা বা ৯,০২,৫৯২ ডলাৰ ব্যয় সাপেক্ষে অসমৰ ব্ৰহ্মপুত্ৰ নদীৰ তলত পথ তথা ৰেল সুৰংগ নিৰ্মাণ কৰিবলৈ গৈ আছে। এই ঘোষণা কৰি ৰে’ল মন্ত্ৰালয় আৰু পথ পৰিবহণ মন্ত্ৰণালয়ে কয় যে সীমান্ত পথ সংস্থাৰ (বিআৰঅ’) সৈতে প্ৰকল্পটোৰ পৰিকল্পনা প্ৰস্তুত কৰা হৈছে। প্ৰকল্পটোত তিনিটা সুৰংগ নিৰ্মাণ কৰা হ’ব, সেইসমূহৰ এটা পথৰ বাবে, দ্বিতীয়টো ৰে’লৱেৰ বাবে আৰু তৃতীয়টো জৰুৰীকালীন উদ্দেশ্যৰ বাবে৷ আৰু এই সকলোবোৰ ‘ক্ৰছ পেচেজ’ৰ সৈতে আন্তঃসংযোগ কৰা হ’ব বুলি সংশ্লিষ্ট কৰ্তৃপক্ষই জানিবলৈ দিছে৷

প্ৰতিটো সুৰংগ ৯.৮ কিলোমিটাৰ দীঘল হ’ব আৰু জামুৰিহাট-শিলঘাটৰ মাজেৰে অসম আৰু অৰুণাচল প্ৰদেশৰ ফালে ৰেলপথ আৰু ঘাইপথসমূহ একত্ৰিত কৰিব। ব্ৰহ্মপুত্ৰৰ উত্তৰ পাৰত থকা ধলাইবিল ৰেল ষ্টেচন আৰু দক্ষিণ পাৰত থকা জখলাবন্ধা ৰেল ষ্টেচনৰ মাজত সংযোগৰ বিন্দু হিচাপে কাম কৰিব এই সুৰংগই৷

ৰে’ল মন্ত্ৰণালয়ৰ অধ্যক্ষতাত অনুষ্ঠিত এক বৈঠকৰ সিদ্ধান্ত অনুসৰি, বিষয়টো সন্দৰ্ভত আলোচনাৰ পিছত সিদ্ধান্ত লোৱা হৈছিল যে যিহেতু পানীৰ তলৰ সুৰংগ প্ৰতিৰক্ষা মন্ত্ৰণালয়ৰ এক অপৰিহাৰ্য প্ৰয়োজনীয়তা, সেয়েহে কাৰিকৰী উপযুক্ততা সাপেক্ষে উত্তৰ-পূব সীমান্ত ৰে’লৱেই ইয়াক পৰ্যবেক্ষণ কৰিব৷ উল্লেখযোগ্য যে, পূৰ্বে ৰাষ্ট্ৰীয় ঘাইপথ আৰু আন্তঃগাঁথনি উন্নয়ন নিগম লিমিটেডে কেৱল বাহনৰ বাবে দুটা সুৰংগ নিৰ্মাণৰ বাবে আনুমানিক ১২,৮০০ কোটি টকা ব্যয়ৰ এটা প্ৰকল্পৰ প্ৰস্তাৱ দিছিল।