বহু কষ্টৰে দৰিদ্ৰ কৃষকে জমা কৰিছিল ২ লাখ টকা;নিগনিয়ে কুটি কৰিলে নষ্ট

ডিজিটেল ডেস্কঃ টকা উপাৰ্জন কৰোতে মানুহৰ বহু কষ্ট আৰু পৰিশ্ৰম নিহিত হৈ থাকে। উপাৰ্জনৰ টকা মানুহে এটকা, দুটকাকৈ সঞ্চয় কৰে ভৱিষ্যতৰ বাবে। এজন ব্যক্তিৰ বাবে আজিৰ যুগত টকা উপাৰ্জন কৰা আৰু আৰু সেয়া সঞ্চয় কৰাটো অতি কঠিন। যদি এনে ক্ষেত্ৰত কোনো এজন মানুহৰ টকা চুৰি হয় বা যদি ধন কৰবাত হেৰুৱায় বা জুইত জাহ যায় সেই দুখ কিমান সেয়া ভুক্তভোগীৰ বাহিৰে কোনেও বুজিব নোৱাৰে। আপুনি এনে ক্ষতিৰ বহুতো ঘটনা দেখিছে বা শুনিছে কিন্তু আজি আমি আপোনাক যি খবৰ দিবলৈ গৈ আছোঁ সেয়া এই সকলোবোৰতকৈ পৃথক। এই ঘটনাটোৱে আপোনাৰো দুচকু সেমেকাই তুলিব। এজন দৰিদ্ৰ কৃষকে বহু কষ্ট কৰি টকা সঞ্চয় কৰিছিল। তেওঁ ঘৰতে এটা কাপোৰৰ মোনাত এটকা, দুটকাকৈ টকাবোৰ জমা কৰি গৈছিল। কিন্তু তেওঁৰ কষ্টৰ ধন নিগনিয়ে কুটি কুটি খাই নষ্ট কৰি পেলাইছিল। তেলেংগানাৰ ইন্দিৰানগৰৰ ভেমানুৰ গাঁৱৰ ৰেদ্যা নায়ক নামৰ এগৰাকী কৃষকৰ জীৱনত সংঘটিত হৈছে এই দুখজনক ঘটনা। ৰেদ্যা নায়কৰ জীৱনজোৰা সঞ্চয় নিগনিয়ে শেষ কৰি পেলাইছিল। নিগনিয়ে কুটি পেলাইছিল তেওঁ বেগত ৰখা ২ লাখ টকা। এই ২ লাখ টকা কৃষকগৰাকীয়ে নিজৰ পেটৰ অস্ত্ৰোপচাৰৰ বাবে জমা কৰিছিল। ৰেদ্যা নায়ক পেছাত এজন ক্ষুদ্ৰ কৃষক। পাচলি বিক্ৰী কৰি তেওঁ ঘৰখন চলায়। ৰেদ্যা নায়কে জনোৱা অনুসৰি তেওঁ বন্ধুবৰ্গৰ পৰা কিছু টকা ধাৰ লৈছিল আৰু যথেষ্ট পৰিশ্ৰম কৰি পাচলি বিক্ৰী কৰি পোৱা টকাখিনি আলমাৰীৰ ভিতৰত কাপোৰৰ মোনা এখনত ৰাখিছিল। কিন্তু কেইদিনমানৰ পিছত তেওঁ আলমাৰীটো খুলি টকাখিনি চাবলৈ কাপোৰৰ মোনাটো খুলি যি দৃশ্য দেখিলে, কোনোমতেহে মূৰ্চা নোযোৱাকৈ থাকিল। নিগনিয়ে তেওঁৰ মুঠ দুই লাখ টকা নষ্ট কৰি পেলাইছিল। এই কথাই দৰিদ্ৰ কৃষকজনৰ মনোবল একেবাৰে ভাঙি পেলাইছিল। অৱশ্যে তেওঁ হাৰ নামানি কেইবাটাও বেংকলৈ টকাখিনি লৈ ঢপলিয়াই যায় কিন্তু সকলোৱে তেওঁক সহায় কৰিবলৈ অস্বীকাৰ কৰে। বেংকৰ মতে আৰবিআইৰ নীতি অনুসৰি পুৰণি ফটা নোট সলনি কৰাৰ নিয়ম আছে কিন্তু এনেদৰে নিগনিয়ে নষ্ট কৰা টকা সলনি কৰাৰ কোনো নিয়ম নাই। ৰেদ্যা নায়কক কিছুমান ব্যৱসায়িক সংস্থাই বিষয়টো হায়দৰাবাদৰ ৰিজাৰ্ভ বেংকৰ ওচৰলৈ নিবলৈ পৰামৰ্শ আগবঢ়ায়। এনে পৰিস্থিতিত তেওঁক কোনোবাই সহায় কৰিবলৈ আগবাঢ়ি আহিব নে নাই সেয়াহে হ'ব লক্ষ্যণীয়। এই ঘটনাই সকলোকে দুখ দিয়াৰ লগতে সাৱধান হবলৈ শিকাই থৈ গ'ল। আৰু পঢ়কঃ ২০ টকীয়া নোট ভাইৰেল! সোনমৰ পাছত এইবাৰ ওলাল ‘ৰাশি বেৱাফা হে’!