কল খালে হয় হাতীৰ সমান বল, এইবাৰ খাবলৈহে লাগিব বল! কি এই ‘বাহুবলী কল’ ?

ডিজিটেল ডেস্কঃ মালভোগ, চেনিচম্পা বা জাহাজী নহয় বজাৰলৈ আহিছে এবিধ বিশেষ কল। এই কলবিধক লৈ এতিয়া মানুহৰ মাজত অন্তহীন কৌতুহলে বিৰাজ কৰা দেখিবলৈ পোৱা গৈছে। কলথোকৰ আকাৰো বিশাল। সেয়েহে সামাজিক মাধ্যমত কলৰ থোকটো 'বাহুবলী কল’ নামেৰেই চৰ্চিত হৈ পৰিছে। ৬০ কিলোগ্ৰাম ওজনৰ এই ৭ ফুট দীঘল কলৰথোকটো সামাজিক মাধ্যমত ভাইৰেল হৈ পৰিছে। জানিবলৈ পোৱা মতে, অন্ধ্ৰপ্ৰদেশৰ পূব গোদাৱৰীৰ কোট্টাপল্লী মণ্ডলৰ ৱাকাটিপ্পা গাঁৱত অনালা সুদৰ্শন নামৰ এগৰাকী ব্যক্তিয়ে কল গছৰ খেতি কৰিছিল। সুদৰ্শনৰ খেতিপথাৰতে আৱিস্কাৰ হয় বৃহদাকাৰ কলৰ থোকটো। তেওঁ সদৰী কৰা মতে, কেইদিনমান পূৰ্বে তেওঁৰ জীয়ৰীয়ে তেওঁক এটা কলপুলি দিছিল। জীয়ৰীৰ পৰা কলৰ পুলিটো লৈ ৰুই দিয়াৰ কেইদিন মানৰ ভিতৰতে এই বিশাল কলভৰ্তি থোকটো দেখিবলৈ পাইছিল সুদৰ্শনে। কলৰ দৈৰ্ঘ্য আৰু প্ৰস্থৰ বাবে সুদৰ্শনে কলৰ থোকটিৰ নাম থৈছে 'বাহুবলী কল'। কলৰ থোকটোত প্ৰায় ১৪০ টা কল আছে আৰু ইয়াৰ মুঠ ওজন ৬০ কিলোগ্ৰাম। তেওঁ কৈছিল যে এই কলৰ থোকটোৰ দৈৰ্ঘ্য ৭ ফুট। উল্লেখ্য যে, সুদৰ্শনৰ বাসগৃহত এতিয়া লানি নিছিগা সোঁত বৈছে মানুহৰ। কলৰ থোকৰ সৈতে যিয়ে যেনেদৰে পাইছে মাৰিছে ছেল্ফী। বহুতৰ মনত উঠিছে প্ৰশ্ন এই বৃহদাকাৰ কলৰ থোকটো এতিয়া খাব নে মিউজিয়ামত সজাই থ’ব? অৱশ্যে, এই সন্দৰ্ভত কোনো ধৰণৰ মন্তব্য কৰা নাই সুদৰ্শনে।