ডিজিটেল ডেস্কঃ দেশে বিদেশে বিয়পি আছে ভাৰতীয় ক্ৰিকেটাৰ বিৰাট কোহলীৰ জনপ্ৰিয়তা। শেহতীয়াকৈ পুনৰ সেই কথাৰ প্ৰমাণ পোৱা গ’ল। পাকিস্তানৰ পৰা বিৰাট কোহলীক লগ কৰিবলৈ গ’ল এগৰাকী বিশেষভাৱে সক্ষম যুৱতী! বিৰাট কোহলীক লগ পাই পূৰণ হ’ল যুৱতীগৰাকীৰ দীৰ্ঘদিনীয়া সপোন।
এছিয়া কাপ ২০২২ বৰ্ষৰ ছিজন শনিবাৰে অৰ্থাৎ ২৭ আগষ্টৰ পৰা আৰম্ভ হ’ব। দেওবাৰে সন্ধিয়া ৭.৩০ বজাৰ পৰা ডুবাই আন্তঃৰাষ্ট্ৰীয় ষ্টেডিয়ামত ক্ৰিকেটাৰ মহাসমৰত নামিব ভাৰত আৰু পাকিস্তান। দুই চিৰবৈৰী ৰাষ্ট্ৰৰ ক্ৰিকেটৰ যুঁজ চাবলৈ ৰৈ আছে সমগ্ৰ ক্ৰিকেটপ্ৰেমী।
বিৰাট কোহলীক লগ পাবৰ বাবেই এগৰাকী যুৱতীয়ে পাকিস্তানৰ কৰাচীৰ পৰা উৰা মাৰিলে ডুবাইলৈ। তেওঁ কেৱলমাত্ৰ বিৰাট কোহলীক লগ কৰিবৰ বাৰেই কৰাচীৰ পৰা ডুবাইলৈ যায়। যুৱতীগৰাকী বিশেষভাৱে সক্ষম।
যুৱতীগৰাকীয়ে ভাৰতীয় দলটোৱে য’ত অনুশীলন কৰি আছিলে তাত গৈ উপস্থিত হয়। যুৱতীগৰাকীয়ে ঘণ্টাৰ পিছত ঘণ্টা ধৰি অধীৰ আগ্ৰহেৰে বিৰাট কোহলীক লগ পাবৰ বাবে ৰৈ আছিল। অৱশেষত পূৰণ হ’ল তেওঁৰ মনৰ হেঁপাহ।
বিৰাটে এই কথা গম পোৱাৰ লগে লগেই যুৱতীগৰাকীক সাক্ষাৎ কৰে। যুৱতীগৰাকীৰ লগত বিৰাট কোহলীয়ে উঠা এখন ফটো এতিয়া ছ’চিয়েল মিডিয়াত ভাইৰেল হৈ পৰিছে।
ফটোখনত দেখা গৈছে এখন হুইলচেয়াৰত যুৱতীগৰাকী বহি আছে আৰু তেওঁৰ কাষতে ৰৈ আছে বিৰাট কোহলী। বিৰাটে যুৱতীগৰাকীৰ লগত বহু সময় ধৰি কথা পাতে। বিৰাট কোহলীক লগ পাই বহুদিনীয়া হেঁপাহ পূৰণ হোৱাৰ আনন্দত যুৱতীগৰাকী আৱেগিক হৈ পৰে। এইগৰাকী অনুৰাগীক লগ পাই বিৰাট কোহলীও আনন্দিত হৈ পৰিছে।
Continue Reading
