ডিজিটেল ডেস্ক : শুকুৰবাৰে পুৱা পূব বেংগালুৰুৰ কেইবাখনো বিদ্যালয়ত বোমা আক্ৰমণৰ ভাবুকি দিয়াৰ কথা পোহৰলৈ আহে। প্ৰাথমিক অনুসন্ধানৰ পাছত আৰক্ষীয়ে প্ৰকাশ কৰা অনুসৰি চহৰখনৰ চাৰিৰ পৰা পাঁচখন বিদ্যালয় আৰু গ্ৰামীন অঞ্চলৰৰ বিদ্যালয়ত বোমা আক্ৰমণৰ ভাবুকি দিয়া হৈছিল।
এখন বিদ্যালয় কল্যাণ নগৰৰ বাবুচাবপলিয়াত অৱস্থিত আৰু আনখন চহৰৰ হাস্কুৰত অৱস্থিত। এই ভাবুকি সন্দৰ্ভত এজন জ্যেষ্ঠ বিষয়াই কয় যে বিদ্যালয়ত বোমা স্থাপন কৰা সম্পৰ্কীয় ভাবুকিৰ বাৰ্তাটো ইমেইলযোগে লাভ কৰা হৈছিল। সন্দেহ কৰা হৈছে যে পুৱা ১০:৪৫ বজাত, ১১:০৯ বজাত আৰু ১১:৩৬ বজাত অজ্ঞাত লোকে তিনিটা ইমেইল প্ৰেৰণ কৰিছে।
এই ভাবুকি বাৰ্তা লাভ কৰাৰ পাছতে বিদ্যালয়কেইখনত উত্তেজনাৰ সৃষ্টি হয় আৰু তাৎক্ষণিকভাৱে বিদ্যালয় চৌহদ খালী কৰা হয়। লগতে আৰক্ষীক এই বিষয়ে অৱগত কৰাৰ লগতে কটকটীয়া নিৰাপত্তাৰ ব্যৱস্থা গ্ৰহণ কৰা হয়৷ ইয়াৰ উপৰি আৰক্ষীয়ে বিদ্যালয়সমূহত উপস্থিত হৈ ইমেইলবোৰৰ সত্যতা পৰীক্ষা কৰি আছে। ঘটনাস্থলীত
বোমা নিষ্ক্ৰিয়কাৰী দল আৰু স্নিফাৰ ডগৰো ব্যৱহাৰ কৰা হৈছে৷
মেইলযোগে প্ৰেৰণ কৰা বাৰ্তাত অজ্ঞাত লোকে প্ৰকাশ কৰে যে, ‘আপোনাৰ বিদ্যালয়ত এটা শক্তিশালী বোমা ৰখা হৈছে, এইটো এটা ধেমালি নহয়৷ তৎক্ষণাত আৰক্ষী আৰু বোমা বিশেষজ্ঞক খবৰ দিয়ক। অন্যথা আপোনাৰ লগতে শ শ জীৱন ক্ষতিগ্ৰস্ত হ'ব পাৰে, পলম নকৰিব৷ এতিয়া সকলো কেৱল আপোনাৰ হাতত আছে।’
Continue Reading
