বিজেপিৰ চকুত বংগ, ভক্তি নে স্বাৰ্থত বিজেপিয়ে ভজে সুভাষ বসুক?

ডিজিটেল ডেস্ক: দুটাকৈ নিৰ্বাচনত মুখ থেকেচা খোৱা বিজেপিয়ে লক্ষ্য এৰি দিয়া নাই বংগ দখলৰ। বিজেপিৰ বাবে অন্যতম বিৰোধী প্ৰতিদ্বন্দ্বীত পৰিণত হৈছে তৃণমূল কংগ্ৰেছ আৰু মমতা বেনাৰ্জী। লোকসভাৰ সাংসদৰ সংখ্যাৰে উত্তৰ প্ৰদেশ আৰু মহাৰাষ্ট্ৰৰ পাছতেই তৃতীয় স্থানত আছে পশ্চিম বংগ। য’ৰ পৰা ৪১জন সাংসদ লোকসভালৈ নিৰ্বাচিত হয়। এনে এখন বৃহৎ ৰাজ্যৰ প্ৰতি বিজেপিৰ লোভনীয় দৃষ্টি স্বাভাৱিক। পশ্চিম বংগৰ ভোটাৰৰ মন জয় কৰিবলৈ গত দিনবোৰত বিজেপিয়ে বহু চেষ্টা অব্যাহত ৰখা দেখা গৈছে। বিশেষকৈ পশ্চিম বংগত নিৰ্ণায়ক ভূমিকা গ্ৰহণ কৰা বঙালী সম্প্ৰদায়ৰ লোকসকলক মোহাচ্ছন্ন কৰিবলৈ বিজেপিৰ ন ন কৌশলে সময়ে সময়ে চকু চাট মাৰি ধৰে। যোৱা দিনবোৰত বিজেপিয়ে ‘কা’ৰ জৰিয়তে বাংলাদেশৰ নিৰ্যাতিত বঙালী হিন্দুসকলক ভাৰতবৰ্ষত সংস্থাপন দিম বুলি প্ৰতিশ্ৰুতি দিছিল। কিন্তু, শিক্ষিত জাতি হিচাপে বঙালীসকলে বুজি পালে বিজেপিৰ চতুৰামি। বঙালীসকলে বুজি পায় কি সঁচা-কি মিছা, কি শুদ্ধ-কি অশুদ্ধ। যাৰ বাবে উচিত প্ৰত্যুত্তৰ পালে বিজেপিয়ে। বঙালীসকলক ভুলাবলৈ এইবাৰ বিজেপিয়ে গ্ৰহণ কৰিছে আন এক পন্থা। ভাৰতৰ প্ৰাতঃস্মৰণীয় পুৰোধা ব্যক্তি, স্বাধীনতা সেনানী নেতাজী সুভাষ চন্দ্ৰ বসুক সন্মান জনাই বঙালী সম্প্ৰদায়ৰ মন জয়ৰ প্ৰচেষ্টা বিজেপিৰ। জাত্যাভিমানী বঙালীসকলৰ নেতাজী, ৰবীন্দ্ৰনাথ ঠাকুৰৰ দৰে ব্যক্তিৰ প্ৰতি থকা অধিক আদৰ-সন্মানৰ লাভ উঠাব বিচাৰিছে নেকি বিজেপিয়ে, তাক লৈ এতিয়া চৌদিশে সৰব চৰ্চা অব্যাহত। প্ৰতিবছৰে ২৪ জানুৱাৰীৰ পৰা আৰম্ভ হোৱা গণৰাজ্য দিৱস সমাৰোহ এইবাৰ এটা দিন আগৰে পৰা অনুস্থিত কৰাৰ সিদ্ধান্ত গ্ৰহণ কৰিছে কেন্দ্ৰীয় চৰকাৰে। ২৩ জানুৱাৰীত নেতাজী সুভাষ চন্দ্ৰ বসুৰ জন্মদিনৰ দিনাৰ পৰাই এইবাৰ আৰম্ভ হ’ব গণৰাজ্য দিৱস সমাৰোহ। নেতাজীক সন্মান জনোৱাৰ স্বাৰ্থতেই এই সিদ্ধান্ত গ্ৰহণ কৰিছে বুলি জানিবলৈ দিছে কেন্দ্ৰীয় চৰকাৰে। শ্বহীদ আৰু স্বাধীনতা সেনানীক সন্মান জনোৱাতো চৰকাৰ দেশৰ প্ৰতিজন নাগৰিকৰ কৰ্তব্য। তাৰ বাবে চৰকাৰৰ এই সিদ্ধান্তক অকপটে আদৰি ল’ব দেশৰ প্ৰতিজন নাগৰিকে। কিন্তু, ২০২৪ চনৰ লোকসভা নিৰ্বাচনত জাত্যাভিমানী বঙালী সম্প্ৰদায় অধ্যুষিত পশ্চিম বংগত খোপনি পোতাৰ উদ্দেশ্যে এই সিদ্ধান্ত কেন্দ্ৰীয় চৰকাৰে গ্ৰহণ কৰিছে বুলি ওলোৱা গুজবে এতিয়া স্বাভাৱিকতেই প্ৰাধান্য লাভ কৰিছে। অসমৰ নিৰ্বাচনৰ আগে আগে কান্ধত গামোচা লোৱা, পশ্চিম বংগৰ নিৰ্বাচনৰ আগে আগে ৰবীন্দ্ৰনাথ ঠাকুৰৰ দৰে মুখাৱয়বৰ গঢ় দিয়া নৰেন্দ্ৰ মোদীয়ে পুনৰ নতুন পদ্ধতিৰে আগবাঢ়িছে বুলি সমালোচিত হৈছে দেশৰ প্ৰতিটো প্ৰান্তত। শ্বহীদ আৰু স্বাধীনতা সেনানীক দিয়া চৰকাৰৰ এই সন্মান নিশ্চিতভাৱে এক সন্মানীয় সিদ্ধান্ত। কিন্তু, যিদৰে আলোচিত হৈছে, সেয়াই যদি চৰকাৰৰ মূল লক্ষ্য হয়, তেনেহ’লে এয়া অতি উদ্বেগজনক হিচাপে বিবেচিত হ’ব। জাতিৰ পিতা মহাত্মা গান্ধীৰ হত্যাকাৰী নাথুৰাম গডছেক পূজা কৰা বিজেপিৰ বাবে নেতাজীক নিৰ্বাচনী আহিলা হিচাপে ব্যৱহাৰ কৰাতো কোনো দ্বিধাগ্ৰস্ততাৰ কাৰণ হ’ব নোৱাৰে বুলিও সচেতন মহলত এতিয়া সৰব চৰ্চা চলিছে৷