বিজেপি এৰিব প্ৰধানমন্ত্ৰী মোদীয়ে! এইবাৰ আহিল নতুন দলত যোগ দিয়াৰ প্ৰস্তাৱ

ডিজিটেল ডেস্ক : ‘আপুনি বহুত জনপ্ৰিয়, আহক মোৰ দলত যোগ দিয়কহি…’ প্ৰধানমন্ত্ৰী নৰেন্দ্ৰ মোদীৰে হাত মিলাই এই প্ৰস্তাৱ দিলে এগৰাকী ৰাষ্ট্ৰনেতাই। মোদীক বিজেপি এৰি তেওঁৰ দলত যোগ দিয়াৰ প্ৰস্তাৱ দিলে নেতাগৰাকীয়ে। এই প্ৰস্তাৱৰ প্ৰত্যুত্তৰ মোদীয়ে দিলে হাঁহিমুখে। এই দৃশ্য এতিয়া ছ’চিয়েল মিডিয়াত ভাইৰেল হৈ পৰিছে। মঙলবাৰে এই ঘটনা ঘটে। COP26 সন্মিলনত ভাগ ল’বলৈ স্কটলেণ্ডৰ গ্লাছগোত উপস্থিত হৈছে প্ৰধানমন্ত্ৰী নৰেন্দ্ৰ মোদী। তাতেই তেওঁৰ সাক্ষাৎ হয় ইজৰাইলৰ প্ৰধানমন্ত্ৰী নাফালী বেনেটৰ সৈতে। এক হাস্যমুখৰ পৰিৱেশত মিলিত হয় দুয়োগৰাকী ৰাষ্ট্ৰনেতা।

তাতেই ইজৰাইলৰ নৱনিৰ্বাচিত প্ৰধানমন্ত্ৰী নাফালী বেনেটে মোদীক প্ৰস্তাৱ দিয়ে, ‘আপুনি ইজৰাইলত বহুত জনপ্ৰিয়। আপুনি মোৰ দলত যোগ দিয়কহি।’ বেনেটৰ এই প্ৰস্তাৱ লাভ কৰি মোদীতে তেওঁৰ হাতত থপৰিয়াই প্ৰাণখুলি হাঁহিবলৈ ধৰে। মোদী আৰু বেনেটৰ এই হাস্যমুখৰ মুহূৰ্তৰ ভিডিঅ’টো টুইটাৰত শ্বেয়াৰ কৰাৰ লগে লগে ব্যাপকভাৱে জনপ্ৰিয় হৈ পৰিছে। উল্লেখ্য যে, ইজৰাইলৰ পূৰ্বৰ প্ৰধানমন্ত্ৰী বেঞ্জামিন নেতান্যাহুৰ সৈতে মোদীৰ ঘনিষ্ঠ সম্পৰ্ক আছিল।

নেতান্যাহু শেহতীয়াকৈ নিৰ্বাচনত পৰাজিত হয় আৰু তেওঁৰ স্থানত অধিষ্ঠিত হয় নাফালী বেনেট। বেনেটৰ সৈতে মোদীৰ এয়াই প্ৰথম আনুষ্ঠানিক সাক্ষাৎ। এই সাক্ষাৎকালত দুয়োগৰাকী নেতাই প্ৰযুক্তিগত বিষয় আৰু উদ্ভাৱন সম্পৰ্কে বিতংভাৱে আলোচনা কৰা বুলি ভাৰতীয় বিদেশ মন্ত্ৰণালয়ে প্ৰকাশ কৰিছে। ইজৰাইলৰ প্ৰধানমন্ত্ৰী বেনেটে দুয়ো দেশৰ মাজৰ বন্ধুত্ব অটুট ৰখাৰ বাবে মোদীৰ ধন্যবাদো জনায়।