‘বিজেপিত থাকি বৰ ডাঙৰ ভুল কৰিলোঁ!’ মুণ্ডন কৰি, যজ্ঞ পাতি বিজেপি ত্যাগ বিধায়কৰ

ডিজিটেল ডেস্কঃ নিৰ্বাচনৰ পূৰ্বে বিজেপিয়ে পালে এক মোক্ষম আঘাত। বিজেপিত থকাৰ বাবে গভীৰ অনুশোচনাৰে দল ত্যাগ কৰিছে শাসকীয় দলৰ এগৰাকী বিধায়কে। ৰাজহুৱাভাৱে মুণ্ডন কৰি, যজ্ঞ পাতি তেওঁ কৰিলে বিজেপিলৈ যোৱাৰ পাপৰ প্ৰায়শ্চিত্ত। ত্ৰিপুৰাৰ সুৰমাৰ বিধায়ক তথা দীৰ্ঘকালৰ বিজেপি নেতা আশিস দাসে মঙলবাৰে কলকাতাৰ কালীঘাট কালী মন্দিৰত মুণ্ডন কৰে আৰু বিজেপিৰ পৰা পদত্যাগ কৰাৰ কথা ঘোষণা কৰে।

মুণ্ডন কৰাৰ পাছত আশিস দাসে কয় যে ‘‘বিজেপিত যোৱাটোৱেই আছিল মোৰ জীৱনৰ আটাইতকৈ ডাঙৰ ভুল৷ গেৰুৱা দলৰ হৈ সেৱা আগবঢ়োৱাটো মোৰ জীৱনৰ অন্যতম ডাঙৰ ভুল বুলি গণ্য কৰি কলকাতাৰ কালীঘাট মন্দিৰত মূৰৰ চুলি খুৰাই যজ্ঞ কৰিলোঁ। এনেকুৱা কৰি নিজকে মই শুদ্ধি কৰিলোঁ৷ বিজেপি শাসিত ত্ৰিপুৰাত ৰাজনৈতিক অৰাজকতা আৰু বিশৃংখলতা বিৰাজ কৰিছে, যাক লৈ জনসাধাৰণ অসন্তুষ্ট৷’’

ত্ৰিপুৰাত বিজেপি নেতৃত্বাধীন চৰকাৰক ক্ষমতাৰপৰা অপসাৰণ কৰাটো তেওঁৰ একমাত্ৰ সংকল্প বুলিও তেওঁ মন্তব্য কৰে। কালীঘাট মন্দিৰ পশ্চিমবংগৰ মুখ্যমন্ত্ৰী মমতা বেনাৰ্জীৰ ঘৰৰ পৰা বেছি দূৰত নহয়। বিজেপি ত্যাগ কৰাৰ পূৰ্বে ত্ৰিপুৰাৰ বিধায়ক আশিস দাসে মমতা বেনাৰ্জীক বংগৰ মাতৃ, মাটি, মানুহৰ প্ৰকৃত নেতা বুলি অভিহিত কৰি কয় যে মমতা বেনাৰ্জী ভৱিষ্যতে প্ৰধানমন্ত্ৰী হ'লে এয়া প্ৰতিজন বঙালীৰ বাবে গৌৰৱৰ বিষয় হ'ব। ভৱানীপুৰ নিৰ্বাচনত মমতা বেনাৰ্জীয়ে যিদৰে অভিলেখ অৰ্জন কৰিছে সেয়া তেওঁৰ অপৰিসীম জনপ্ৰিয়তাৰ আন এটা প্ৰমাণ। মমতা বেনাৰ্জীক প্ৰশংসাৰে ওপচাই দিয়ালৈ চাই সদ্য বিজেপি ত্যাগী বিধায়ক দাসে তৃণমূল কংগ্ৰেছ দলত যোগদান কৰাৰ পূৰ্ণ সম্ভাৱনা আছে।