ডিজিটেল ডেস্কঃ ভাৰতৰ টাটা গ্ৰুপৰ দ্বাৰা পৰিচালিত এয়াৰ ইণ্ডিয়াৰ বিমানত নিগনি। নিগনিৰ উত্পাতৰ বাবে বৃহস্পতিবাৰে শ্ৰীনগৰৰ পৰা জম্মু অভিমুখী বিমানখন প্ৰায় দুঘণ্টা পলমকৈ উৰা মাৰে। ভাৰতৰ বিমান নিয়ন্ত্ৰক অসামৰিক বিমান পৰিচালনা সঞ্চালকালয়ে (ডিজিচিএ) ঘটনাটোৰ তদন্তৰ নিৰ্দেশ দিছে। শ্ৰীনগৰ বিমানবন্দৰ কৰ্তৃপক্ষই জনোৱা অনুসৰি, এয়াৰ ইণ্ডিয়াৰ বিমান এআই ৮২২ বৃহস্পতিবাৰে দুপৰীয়া ২ বজাত শ্ৰীনগৰ বিমানবন্দৰৰ পৰা ৰাওনা হোৱাৰ কথা আছিল।
কিন্তু উৰা মৰাৰ আগতে নিয়মীয়া পৰীক্ষাৰ সময়ত বিমানখনত নিগনিৰ উপস্থিতি দেখা গৈছিল। নিগনিৰ উপস্থিতিৰ খবৰ বিয়পি পৰাৰ লগে লগে হৈ চৈ লাগে আৰু বিমানৰ ভিতৰতে আৰম্ভ হৈছিল অনুসন্ধান। ঘণ্টাজোৰ প্ৰচেষ্টাৰ অন্তত নিগনিটো ধৰা পৰে। অৱশেষত বিমানখন শ্ৰীনগৰৰ পৰা জম্মুলৈ আবেলি ৪.১০ বজাত উৰা মাৰিছিল। অৱশ্যে, এয়াৰ ইণ্ডিয়া কৰ্তৃপক্ষই ঘটনাটোৰ বিষয়ে কোনো বিবৃতি দিয়া নাই। স্বাভাৱিকতে, বিমানৰ ভিতৰত নিগনি কেনেকৈ সোমাল? সম্প্ৰতি এয়া এক ৰহস্যজনক বিষয় হিচাপে বিবেচিত হৈছে।
