বিপদ আঁতৰা নাই ফাহাদ শ্বাহৰ: তৃতীয়বাৰৰ বাবে গ্ৰেপ্তাৰ কাশ্মীৰৰ সাংবাদিক

ডিজিটেল ডেস্ক: জম্মু আৰু কাশ্মীৰৰ সাংবাদিক ফাহাদ শ্বাহৰ বিপদ আঁতৰা নাই৷ কাশ্মীৰত সন্ত্ৰাসবাদী কাৰ্যকলাপত উচতনিমূলক কাৰ্যৰ বাবে গ্ৰেপ্তাৰ হোৱা সাংবাদিক ফাহাদ শ্বাহ তৃতীয়বাৰৰ বাবে পুনৰ গ্ৰেপ্তাৰ হৈছে৷ জম্মু আৰু কাশ্মীৰৰ সাংবাদিক ফাহাদ শ্বাহে অদ্যাপি মুক্তি লাভ কৰা নাই৷ জামিনৰ কেইঘণ্টামান পাছতে আজি পুনৰ সাংবাদিক শ্বাহক তৃতীয়বাৰৰ বাবে গ্ৰেপ্তাৰ কৰা হয়৷ অনলাইন বাতৰি আলোচনী ‘থেকাশ্মীৰৱালা’ৰ মুখ্য সম্পাদক শ্বাহক এই বছৰৰ ৪ ফেব্ৰুৱাৰীত পুলৱামা আৰক্ষীয়ে গ্ৰেপ্তাৰ কৰিছিল। ২৬ ফেব্ৰুৱাৰীত ২২ দিন জিম্মাত থকাৰ পাছত NIA আইনৰ অধীনত এখন বিশেষ আদালতে তেওঁক জামিন প্ৰদান কৰে। পৰৱৰ্তী সময়ত তেওঁক শ্বপিয়ান আৰক্ষীয়ে গ্ৰেপ্তাৰ কৰে আৰু শনিবাৰে তেওঁ জামিন লাভ কৰে। বৰ্তমান তেওঁ শ্ৰীনগৰৰ চাফাকাদল আৰক্ষী চকীত বন্দী হৈ আছে আৰু তেওঁৰ অধিবক্তাই পুনৰ জামিন স্থানান্তৰ কৰিবলৈ সাজু হৈছে। এক বিবৃতিত জম্মু-কাশ্মীৰ আৰক্ষীয়ে উল্লেখ কৰিছে যে সাংবাদিক ফাহাদ শ্বাহক তিনিটা গোচৰত ‘সন্ত্ৰাসবাদক গৌৰৱান্বিত কৰা, ভুৱা বাতৰি প্ৰচাৰ কৰা আৰু আইন-শৃংখলা (এল এণ্ড অ’) পৰিস্থিতি সৃষ্টি কৰাৰ বাবে সাধাৰণ ৰাইজক উচতনি দিয়াৰ বাবে বিচৰা হৈছিল। ৩৩ বছৰীয়া যুৱকজনক ছ’চিয়েল মিডিয়াৰ পোষ্টৰ বাবে গ্ৰেপ্তাৰ কৰা হৈছিল৷ উল্লেখযোগ্য যে, সন্ত্ৰাসবাদী কাৰ্যকলাপক প্ৰোৎসাহিত কৰাৰ অভিযোগ আছে তেওঁৰ বিৰুদ্ধে৷