ডিজিটেল ডেস্ক: দীপাৱলীৰ দিনটোতে উজলি উঠিল তেওঁলোকৰ মনৰ আকাশ৷ পোহৰ হৈ পৰিল তেওঁলোকৰ ঘৰকেইখনো৷ আজি যে তেওঁলোক পোহৰৰ বাটেৰে উভতিব আপোন ঘৰলৈ৷
পাকিস্তানৰ কৰাচীৰ কাৰাগাৰৰ পৰা মুকলি হৈছে আশীজন ভাৰতীয় মাছমৰীয়া৷ দেওবাৰে ৰে’লযোগে গুজৰাটৰ বদোদৰাত উপস্থিত হয় তেওঁলোক৷ তাৰ পৰা তেওঁলোকক দীপাৱলীৰ বাবে তেওঁলোকৰ পৰিয়ালৰ সৈতে পুনৰ্মিলিত হ’বলৈ বাছযোগে ৰাজ্যখনৰ গিৰ সোমনাথ জিলাৰ ভেৰাভাললৈ লৈ যোৱা হয় বুলি এজন বিষয়াই সদৰী কৰে।
মাছমৰীয়াসকলক বৃহস্পতিবাৰে পাকিস্তানী কৰ্তৃপক্ষই মুকলি কৰি দিয়ে আৰু পাছদিনা পঞ্জাবৰ আটাৰী-ৱাঘা সীমান্তত ৰাজ্যখনৰ মীন বিভাগৰ এটা দলক গতাই দিয়া হয় বুলি এক চৰকাৰী বিজ্ঞপ্তিত কোৱা হৈছে।
তেওঁলোকে ২০২০ত নিয়মীয়া ব্যৱধানত গুজৰাট উপকূল ত্যাগ কৰিছিল আৰু সেই দেশৰ পানীত মাছ ধৰাৰ অভিযোগত পাকিস্তানৰ সামুদ্ৰিক বাহিনীৰ দ্বাৰা তেওঁলোকক ধৰি ৰখা হৈছিল৷ মুকলি কৰা ৮০জন মাছমৰীয়াৰ ভিতৰত ৫৯জন গিৰ সোমনাথ জিলাৰ, ১৫জন দেৱভূমি দ্বাৰকাৰ, দুজন জামনগৰৰ, এজন আমৰেলীৰ৷ আনহাতে তিনিজন কেন্দ্ৰীয় শাসিত অঞ্চল দিউৰ বুলি বিজ্ঞপ্তিটোত কোৱা হৈছে।
বিজ্ঞপ্তিটোত লগতে কোৱা হৈছে যে তেওঁলোক সকলোকে ২০২০ত আটক কৰিছিল পাকিস্তানে৷ প্ৰায় ২০০ জন মাছমৰীয়া এতিয়াও পাকিস্তানৰ কাৰাগাৰত বন্দী হৈ আছে। এতিয়া মুক্ত মাছমৰীয়াসকলে তেওঁলোকৰ পৰিয়ালৰ সৈতে দীপাৱলী পালন কৰিবলৈ সক্ষম হ’ব৷
উল্লেখ্য যে এই বছৰৰ মে’ আৰু জুন মাহতো পাকিস্তান চৰকাৰে প্ৰায় ৪০০ ভাৰতীয় মাছমৰীয়াক মুকলি কৰি দিছিল।
Continue Reading
