ডিজিটেল ডেস্কঃ 'বিশ্বৰ আটাইতকৈ দুখী হাতী’জনীৰ মৃ্ত্যু হৈছে। ফিলিপাইনছৰ মেনিলাৰ এখন চিৰিয়াখানাত দশক দশক ধৰি অকলে বাস কৰি আহিছিল 'মালি’ নামৰ এই হাতীজনীয়ে। পিপল ফৰ দ্য এথিকেল ট্ৰিটমেণ্ট অৱ এনিমেলছ (পেটা)-ই হাতীজনীক “বিশ্বৰ আটাইতকৈ দুখী হাতী” বুলি অভিহিত কৰিছিল।
'মালি’ৰ প্ৰকৃত- বিশ্ব মা’আলি। মৃত্যুৰ সময়ত বয়স ৪৩ বছৰ বুলি অনুমান কৰা হৈছে। মঙলবাৰে বিয়লি ৩.৪৫ বজাত তেওঁৰ মৃত্যু হোৱা বুলি ফিলিপাইনছৰ ৰাজধানী মেনিলা চহৰৰ মেয়ৰ হানি লেকুনাই ঘোষণা কৰে। বেছিভাগ সময় অকলে বাস কৰা হাতীজনীক চাবলৈ মেনিলা চিৰিয়াখানাত নিয়মিতভাৱে ভিৰ হৈছিল।
চিৰিয়াখানাখনৰ মুখ্য পশু চিকিৎসক ডাঃ হাইনৰিখ পেট্ৰিক পেনা-ডমিংগোৱে কয় যে কিছুদিনৰ পৰা মালিয়ে নিজৰ গাটো ৱালত অহৰহ ঘঁহি থকা দেখা গৈছিল, যাৰ পৰা অনুমান কৰিব পাৰি যে তাইৰ বিষ হৈছে। মঙলবাৰে মালিৰ অৱস্থা বেয়া হৈ পৰিল আৰু তাই কাষতে পৰি থাকিল, উশাহ-নিশাহ ল’লে। চিৰিয়াখানাৰ পশু চিকিৎসকে এন্টিহিষ্টামিন আৰু ভিটামিন দিছিল যদিও দুপৰীয়াৰ ভাগত তেওঁৰ মৃত্যু হয়। মৰণোত্তৰ পৰীক্ষাত হাতীটোৰ অগ্নাশয়ৰ কৰ্কট ৰোগ ধৰা পৰিছে বুলি মুখ্য পশু চিকিৎসকগৰাকীয়ে জনায়।
উল্লেখ্য যে ১৯৮৮ চনত শ্ৰীলংকাই তেতিয়াৰ ফিলিপাইনছৰ প্ৰথম মহিলা ইমেল্ডা মাৰ্কছক উপহাৰ হিচাপে ফিলিপাইনছলৈ প্ৰেৰণ কৰিছিল মালিক। মেনিলালৈ লৈ যোৱাৰ সময়ত তাইৰ বয়স ১১ মাহ আছিল। ১৯৭৭ চনৰ পৰা চিৰিয়াখানাত বাস কৰা আন এটা হাতী শিৱৰ সৈতে প্ৰথম দিনকেইটা কটায়। ১৯৯০ চনত শিৱৰ মৃত্যু হয়। তেতিয়াৰ পৰাই মালি অকলে বাস কৰিছিল। মেনিলা চিৰিয়াখানাও আৰ্থিক অভাৱত ভুগিছিল, সেয়ে মালিৰ বাবে আন এটা হাতী ক্ৰয় কৰিবলৈ অসমৰ্থ্য আছিল।
পশু অধিকাৰ কৰ্মীসকলে মালিক আন এখন দেশলৈ অথবা অৰণ্যত মুকলি কৰি দিয়াৰ আহ্বান জনাইছিল আৰু মেনিলা চিৰিয়াখানা কৰ্তৃপক্ষক সমালোচনা কৰিছিল। ২০০৫ চনত পেটাই মালিক স্থানান্তৰিত কৰাৰ বাবে অভিযান আৰম্ভ কৰিছিল, যিয়ে নোবেল বঁটা বিজয়ী জে এম ক’টজি, মৰিচি, পশু কল্যাণ অভিযানকাৰী জেন গুডালৰ দৰে উচ্চ পদস্থ ব্যক্তিত্ববিদৰ পৰা সমৰ্থন লাভ কৰিছিল।
ফিলিপাইনছ চৰকাৰ আৰু চিৰিয়াখানা কৰ্তৃপক্ষই এইসমূহৰ প্ৰত্যুত্তৰত কয় যে মালিয়ে চিৰিয়াখানাত থকাটোৱেই উত্তম কাৰণ তেওঁ অৰণ্যত কেনেকৈ জীয়াই থাকিব নাজানিলেহেঁতেন। পশু কল্যাণকৰ্মী ইছা গাৰ্চিট’ৰেনাই মালিক “বিশ্বৰ আটাইতকৈ দুখজনক হাতী” আখ্যা দিয়ে।
Continue Reading
