বিশ্বৰ প্ৰথম: কাগজমুক্ত হ’ল ডুবাই চৰকাৰ; কি হ’ব লাভালাভ?

ডিজিটেল ডেস্ক: মৰুভূমিত আধুনিকতাৰ বীজ সিচি গঢ়ি উঠিছে অত্যাধুনিক দেশ ডুবাই। নিতৌ নতুন চমকেৰে পৃথিৱীৰ বক্ষত আলোকিত হৈ আছে ডুবাই। আকাশ চুইছে ডুবাইৰ সু-উচ্চ অট্টালিকাবোৰে। পুনৰবাৰ বিশ্ববাসীৰ দৃষ্টি আকৰ্ষিত কৰিছে মৰুৰ দেশখনে। বিশ্বৰ প্ৰথমখন কাগজমুক্ত চৰকাৰৰূপে স্বীকৃতি লাভ কৰিছে ডুবাই চৰকাৰে। আধুনিকতাৰ পৃথিৱীত আৰু এখোজ আগুৱাই গৈ সম্পূৰ্ণ ডিজিটেলাইজড কৰা হৈছে ডুবাই চৰকাৰ।

ৰাজকুমাৰ শ্বেইখ হামডান বিন মহম্মদ বিন ৰাশ্বিদ অল মকতুমে ডুবাই চৰকাৰক ১০০ শতাংশ কাগজমুক্ত হিচাপে ঘোষণা কৰে। তেওঁ কয় যে, ইয়াৰদ্বাৰা দেশখনৰ ৩৫ কোটি মাৰ্কিন ডলাৰ আৰু ১.৪ কোটি শ্ৰম ঘণ্টা ৰাহি হ’ব। শ্বেইখে লগতে কয় যে, আভ্যন্তৰীণ আৰু বাহ্যিক লেন-দেন তথা ডুবাই চৰকাৰৰ সকলো প্ৰক্ৰিয়া এতিয়াৰেপৰা ১০০ শতাংশ ডিজিটেল মাধ্যমত সম্পাদিত হ’ব। ডুবাই চৰকাৰৰ এই পদক্ষেপে দেশখনৰ নাগৰিকসকলক স্মাৰ্ট চিটীৰ অন্য এক উপলব্ধি কৰাব।

কাগজমুক্ত চৰকাৰৰূপে গঢ় লোৱা ডুবাই চৰকাৰ বিশ্বৰ সকলো দেশৰ বাবে এক আদৰ্শ। ডুবাই চৰকাৰ কাগজমুক্ত হোৱাৰ ফলত কাগজ তৈয়াৰ কৰিবলৈ ব্যৱহৃত প্ৰাকৃতিক সম্পদ অক্ষয় হৈ থাকিব। লগতে প্ৰদূষণৰ মাত্ৰাও বহু পৰিমানে লাঘৱ হ’ব। সময়ৰ ৰাহি কাগজমুক্ত চৰকাৰখনৰ বাবে এক অন্যতম যোগাত্মক দিশ।