বিশ্ববিদ্যালয়ত অঘটন! প্ৰেমিকাক লৈ কৰা মন্তব্য সহিব নোৱাৰি ছাত্ৰক গুলীয়াই হত্যা প্ৰেমিকৰ

ডিজিটেল ডেস্কঃ প্ৰেমিকাক অন্য এজন যুৱকে কৰা মন্তব্য সহ্য কৰিব নোৱাৰি প্ৰেমিকে ঘটালে অঘটন৷ এই ঘটনা গুৰুগ্ৰামৰ৷ গুৰুগ্ৰামৰ এছজিটি বিশ্ববিদ্যালয়ত প্ৰেমিকাৰ ওপৰত কৰা মন্তব্যৰ প্ৰতিশোধ ল’বলৈ আইনৰ এজন ছাত্ৰই মেডিকেলৰ এজন ছাত্ৰৰ পেটলৈ লক্ষ্য কৰি গুলীয়ায়৷ গুলীবিদ্ধ হোৱাৰ পিছত যুৱকজন ঘটনাস্থলীতে বাগৰি পৰে। গুলীবৰ্ষণৰ শব্দ শুনি উপস্থিত লোকৰ মাজত আতংকৰ সৃষ্টি হয়৷

গুলীবিদ্ধ যুৱকজনক লৰালৰিকৈ শিক্ষাৰ্থী আৰু গাৰ্ডে মিলি জৰুৰীকালীন চিকিৎসাৰ বাবে লৈ গৈছিল। কিন্তু অধিক ৰক্তক্ষৰণৰ বাবে যুৱকজনৰ মৃত্যু হয় বুলি জনায় চিকিৎসকে৷ ৰাজেন্দ্ৰপাৰ্ক আৰক্ষী থানাৰ ভাৰপ্ৰাপ্ত বিষয়াই সদৰী কৰা অনুসৰি এছ জি টি বিশ্ববিদ্যালয় চৌহদস্থিত পাৰ্কিঙত দিল্লীৰ নজফগড়ৰ বাসিন্দা লাকীয়ে উত্তৰ প্ৰদেশৰ চামলিৰ বাসিন্দা বিনীত(২৩)ক গুলীয়াই হত্যা কৰে। গুলীয়ে তেওঁৰ পেটত আঘাত কৰিছিল আৰু অধিক ৰক্তক্ষৰণৰ বাবে তেওঁ মৃত্যুক সাৱটে৷

বিনীত মেডিকেলৰ চতুৰ্থ বৰ্ষৰ ছাত্ৰ আছিল। আৰক্ষীয়ে অনুসন্ধানৰ সময়ত জানিব পাৰিছে যে এগৰাকী এমএছচি তৃতীয় বৰ্ষৰ ছাত্ৰীৰ সৈতে লাকীৰ প্ৰেমজনিত সম্পৰ্ক আছিল। বিনীতে ছাত্ৰীগৰাকীৰ বিষয়ে কিবা মন্তব্য প্ৰদান কৰিছিল। সেই মন্তব্য সহ্য কৰিব নোৱাৰি ইয়াৰ প্ৰতিশোধ ল’বলৈ লাকীয়ে এই হত্যাকা্ণ্ড সংঘটিত কৰে। আৰক্ষীয়ে অভিযুক্তজনক গ্ৰেপ্তাৰ কৰাৰ লগতে ঘটনাটোৰ তদন্ত আগবঢ়াই নিছে৷