ডিজিটেল ডেস্কঃ বিশ্বকাপৰ ফাইনেলত পূৰ্বৰ বিশ্ববিজয়ী অধিনায়কসকলক ব্লেজাৰ প্ৰদান কৰা হ’ব। কপিল দেৱ, মহেন্দ্ৰ সিং ধোনীৰ লগতে ৱেষ্ট ইণ্ডিজ, অষ্ট্ৰেলিয়া, শ্ৰীলংকা আৰু ইংলেণ্ডৰ বিশ্বকাপ বিজয়ী অধিনায়কসকলক প্ৰদান কৰা হ’ব এই ব্লেজাৰ। কিন্তু এজন বিশ্বকাপ বিজয়ী অধিনায়কে সেই অনুষ্ঠানত উপস্থিত থাকিব নোৱাৰিব। কোন তেওঁ ? তেওঁ পাকিস্তান দলৰ প্ৰাক্তন অধিনায়ক ইমৰান খান ।
তেওঁ বৰ্তমান দুৰ্নীতিৰ গোচৰত কাৰাগাৰত আছে। গতিকে বিশ্বকাপৰ ফাইনেলত সকলো অধিনায়ককে দেখা গৈছে যদিও ভাৰতৰ চুবুৰীয়া দেশ পাকিস্তানৰ প্ৰাক্তন অধিনায়কগৰাকী উপস্থিত হ’ব পৰা নাই।
দেওবাৰে দুয়োটা ইনিংছৰ মাজতে বিশ্বকাপ বিজয়ী অধিনায়কসকলক সন্মানিত কৰাৰ কথা আছে। তেওঁলোকক এটা বিশেষ ব্লেজাৰ দিয়াৰ কথা। ক্লাইভ লইড (১৯৭৫ আৰু ১৯৭৯), কপিল দেৱ (১৯৮৩), এলেন বৰ্ডাৰ (১৯৮৭), অৰ্জুন ৰাণাতুঙ্গা (১৯৯৬), ষ্টিভ ৱ’ (১৯৯৯), ৰিকি পন্টিং (২০০৩ আৰু ২০০৭), মহেন্দ্ৰ সিং ধোনী (২০১১), মাইকেল ক্লাৰ্ক (২০১৫) আৰু ইয়ন মৰ্গান (২০১৯) উপস্থিত আছে।
উল্লেখ্য খেল এৰি ইমৰানে ৰাজনীতিত যোগদান কৰিছিল। তেওঁ পাকিস্তানৰ প্ৰধানমন্ত্ৰীও হৈছিল। তেওঁৰ বিৰুদ্ধে নানান অভিযোগ উত্থাপিত হৈছিল। তেওঁক গ্ৰেপ্তাৰ কৰা হৈছিল। তেওঁ বৰ্তমান কাৰাগাৰতে আছে। গতিকে দেওবাৰে আহমেদাবাদলৈ পূৰ্বৰ বিশ্বকাপ জয়ী দলৰ সকলো অধিনায়ক আহিলেও, ইমৰানক দেখা নগ’ল।
Continue Reading
