বিয়াৰ ফুল ফুটিছে ৰাজকুমাৰ-পত্ৰলেখাৰ,জয়ঢোল কোবাব কোনে ?

নতুন দিল্লীঃ বিয়াৰ ছেহনাই বাজি উঠিছে বলীউডত। কেট সুন্দৰী,ভাট কন্যাৰ বিয়াৰ খবৰে সংবাদ শিৰোনাম দখল কৰাৰ সময়তে খবৰ আহিছে আৰু এখন বিয়াৰ। এইবাৰ বিবাহ পাশত আৱদ্ধ হবলৈ লৈছে ৰাজকুমাৰে। দিন কাল ঠিকে থাকিলে হোমৰ জুইক সাক্ষী কৰি চলিত বৰ্ষতে লক্ষিমী চপাব ৰাজকুমাৰে। প্ৰেয়সী পত্ৰলেখাৰ সৈতে জীৱনৰ নতুন ইনিংছ আৰম্ভ কৰিবলৈ সাজু হৈছে দুই বলীউড তাৰকা। খবৰতো প্ৰকাশ পোৱাৰ পাছতে বলীউডত এতিয়া আনন্দৰ ৰোল উঠিছে।

জানিবলৈ পোৱা মতে, ৰাজকুমাৰ-পত্ৰলেখাৰ সম্পৰ্ক প্ৰায় এক দশক পুৰণি। কিমান আৰু প্ৰেমৰ ভাকুটকুট। এইবাৰ বিবাহৰ প্ৰস্তাৱ। বলীউডৰ আলোচনাতো এইহাল ৰোমিঅ’-জুলিয়েটৰ প্ৰেমৰ বিষয়ে প্ৰায়ে উত্থাপিত হৈ আহিছে। কেতিয়া বিবাহ পাশত আৱদ্ধ হ'ব সেই সম্পৰ্কেও দুয়োজনে একাধিক প্ৰশ্নবাণৰ সন্মুখীন হবলগীয়া হৈছে। ৰাজকুমাৰ-পত্ৰলেখাই সদৰী কৰা অনুসৰি তেওঁলোকৰ বিবাহ ১০-১২ নৱেম্বৰৰ ভিতৰত অনুষ্ঠিত হোৱাৰ সম্ভাৱনা আছে। বলীউড ইণ্ডাষ্ট্ৰীৰ কেইবাজনো তাৰকাক এইবিষয়ে অৱগত কৰিছে ৰাজকুমাৰ-পত্ৰলেখাই।

অৱশ্যে, পূৰ্বে এক সাক্ষাৎকাৰত পত্ৰলেখাই অহা ছয়-সাত বছৰৰ ভিতৰত বিবাহ পাশত আৱদ্ধ নহয় বুলি সদৰী কৰিছিল। ইয়াৰ পৰিৱৰ্তে, তেওঁ তেওঁৰ পেছাদাৰী জীৱনৰ বিষয়ে ভাবিবলৈ অধিক ইচ্ছুক বুলিহে মন্তব্য কৰিছিল। কিন্তু হঠাতে নিজৰ পথ সলনি কৰিছে পত্ৰলেখাই। পত্ৰলেখাৰ ‘ৰাজকুমাৰে’ কি মোহনী বাণ মাৰিলে সেয়া ৰাজকুমাৰেহে জানিব…!