বিয়া নে ব্যৱসায়! ৮০ কোটিত বিক্ৰী বিকী-কেটৰিনাৰ বিয়া সম্প্ৰচাৰৰ স্বত্ব, লেফাফাৰ টকা আছেই...

ডিজিটেল ডেস্ক: ৰজনজনাই আছে ৰাজস্থান। বিকী-কেটৰিনাৰ ৰাজকীয় বিয়াত দৃষ্টি নিবদ্ধ সমগ্ৰ বলীউড জগতৰ। বহুদিনীয়া জল্পনা-কল্পনাৰ অন্ত পেলাই আৰম্ভ হৈছে বিয়াৰ ৰাজকীয় আয়োজন। সংবাদ মাধ্যমকে আদি কৰি অতিথিৰ মোবাইল ফোনো নিষিদ্ধ বিয়াখনত। কোনেও ৰাজহুৱা কৰিব নোৱাৰিব বিয়াৰ ফটো। এই আজব এছঅ’পিৰ আঁৰৰ ৰহস্য ভেদ হৈছে। এক আগশাৰীৰ অ’টিটি প্লেটফৰ্মক বিকী-কেটৰিনাৰ বিয়া সম্প্ৰচাৰৰ স্বত্ব বিক্ৰী কৰা বুলি সংবাদ মাধ্যমত প্ৰকাশ পাইছে।

মঙলবাৰৰ পৰা ৰাজস্থানৰ ছিক্স ছেনছেছ ফ’ৰ্টত আৰম্ভ হৈছে বিকী কৌশল আৰু কেটৰিনা কাঈফৰ বিবাহ অনুষ্ঠান। ফটো লোৱা নিষেধ, ছিক্ৰেট ক’ডেৰে প্ৰৱেশ… কিমান যে কি এছঅ’পি! বিয়া নহয় যেন ছিক্ৰেট মিছনহে! বিকী-কেটৰিনাৰ বিয়াক লৈ কত কিমান যে গুজব! বিয়াৰ নিষেধাজ্ঞাক লৈ চলিছিল বু বু-বা বা। পিছে এতিয়াহে ওলাল ওৰহি গছৰ ওৰ! দেশৰ আগশাৰীৰ অ’টিটি প্লেটফৰ্ম এমাজন প্ৰাইমক বিকী-কেটৰিনাৰ বিয়াৰ সম্প্ৰচাৰৰ স্বত্ব বিক্ৰী কৰা বুলি এক সংবাদ মাধ্যমত প্ৰকাশ পাইছে। ৮০ কোটি টকাৰ বিনিময়ত এমাজন প্ৰাইমক বিক্ৰী কৰা হৈছে বিয়াখন সম্প্ৰচাৰৰ স্বত্ব। বিশাল ধনৰাশীৰ বিনিময়ত কৰা চুক্তিৰ বাবেই বিকী-কেটৰ বিয়াৰ অতিথিয়ে মানিবলগা হৈছে কেতবোৰ নিষেধাজ্ঞা।

বন্ধুত্বৰ পৰা প্ৰেমৰ সম্পৰ্কলৈকে সকলো সামৰি ল’ব অ’টিটি প্লেটফৰ্মত সম্প্ৰচাৰ হ’বলগা বিয়াখনৰ ছিৰিজে। ২০২২ৰ প্ৰথম ভাগতে বিকী-কেটৰ বিয়াৰ ভিডিঅ’ ডিজিটেল প্লেটফৰ্মত ওলাব বুলি তথ্য প্ৰকাশ পাইছে। উল্লেখ্য যে, বিয়াখনৰ নিমন্ত্ৰিত অতিথিসকলক সম্পূৰ্ণ গোপনীয়তা মানিবলৈ আৰু কোনোধৰণৰ ফটো প্ৰকাশ নকৰিবলৈ অনুৰোধ জনোৱা হৈছিল। অতিথিসকললৈ প্ৰেৰণ কৰা এক বাৰ্তাত উল্লেখ আছে, ‘আমি আপোনালোকক মোবাইল ফোনবোৰ নিজৰ নিজৰ কোঠাত থৈ আহিবলৈ আৰু অনুষ্ঠানৰ কোনোধৰণৰ ফটো ছ’চিয়েল মিডিয়াত প্ৰকাশ নকৰিবলৈ অনুৰোধ জনালো’।