ফলমূল,শাক-পাছলি, মাছৰ পৰা মৌলৈকে কি নাই! বোকাখাতত কৃষি বিপ্লৱৰ চমক প্ৰাক্তন নৌ সেনাৰ ডুবাৰু চম্পক ডেকাৰ

ডিজিটেল ডেস্কঃ মন কৰিলেই চন বাকৰি মাটিতে ধন। প্ৰায় দহ বিঘাৰ এখন মুকলি পথাৰ। লকডাউনৰ সময়তে এখন মুক্ত পথাৰত দেখিছিল সপোনৰ প্ৰথম খোজ এজন মানুহে। তেওঁৰ নাম চম্পক ডেকা।পেছাত বিদেশত কৰ্মৰত এজন নৌ সেনাৰ ডুবাৰু।কৰ্মক্ষেত্ৰৰ পৰা অৱসৰ গ্ৰহণ কৰি বোকাখাত গড়মুৰ গাঁৱত আৰম্ভ কৰিলে নিজৰ প্ৰচেষ্টাত কৃষি বিপ্লৱ।

তাৰ সমান্তৰালভাৱে পৰ্যটন ক্ষেত্ৰতো দেখুৱাইছে তেওঁ বিশেষ পদক্ষেপ।কৰ্মৰ সময়ত পৃথিৱীৰ বিভিন্ন ঠাইত এজন ডুবাৰু হিচাপে বিভিন্ন তেল খাদসমূহৰ লগতে বিভিন্ন ক্ষেত্ৰত কৰ্ম সম্পাদন কৰি আহিছে চম্পক ডেকাই।অৱসৰ পিছত ঘৰতে নিজৰ প্ৰচেষ্টাত আৰম্ভ কৰিছে কৃষি বিপ্লৱৰ সূচনা।

ফলমূলৰ পৰা আৰম্ভ কৰি শাক-পাছলিলৈ, পুখুৰীত হাঁহ, মাছকে ধৰি গাখীৰ, মৌ লৈকে সকলো জৈৱিক ভাবে নিজে উৎপাদন কৰি আহিছে চম্পক ডেকাই।

চালে চকু ৰোৱা বাৰীখনত কল, তামোলৰ, বিভিন্ন টেঙা, অমিতা ,হালধি, মুধুৰীলৈ সকলো ভৰপূৰ।গাখীৰ, মৌ, মাছ সকলো উপলব্ধ তেওঁৰ চৌপাশত। সমান্তৰালভাৱে পৰ্যটন ক্ষেত্ৰখনো তেওঁ আগবঢ়াই লৈ গৈছে।

ঘৰতে নিজে কৰা জহা, বৰা ধানৰ লগতে ঘৰতে উৎপাদিত সকলো সামগ্ৰীৰে থলুৱা গাঁৱলীয়া নিভাঁজ পৰিৱেশত মানুহক আপ্যায়ন কৰিবলৈ সাজিছে দুটাকৈ কুটীৰ আৰু কেঁচা পাকঘৰ। বিদেশত কৰ্মৰত এইগৰাকী অসমীয়াই কেঁচা মাটিৰ গোন্ধৰে উজ্জীৱিত হৈ কৰা কৰ্মই নিজৰ লগতে আন দহ জনকো উৎসাহিত কৰিছে।