বৃহস্পতিবাৰে হৈছিল সন্ধানহীন, শুকুৰবাৰে ওলাল বেগৰ ভিতৰত ভৰাই থোৱা ডিঙি কটা মৃতদেহ

ডিজিটেল ডেস্ক : এক শিহৰণকাৰী হত্যাকাণ্ডই জোকাৰি গৈছে ৰাজধানী দিল্লীক। শিহৰণকাৰী এই ঘটনা পোহৰলৈ অহাৰ পাছতে ৰাজধানীত সৃষ্টি হৈছে ব্যাপক চাঞ্চল্যৰ।  এটা ট্ৰেভেল বেগৰ ভিতৰত এগৰাকী কিশোৰৰ ডিঙি কটা মৃতদেহ উদ্ধাৰ হোৱাৰ এই শিহৰণকাৰী ঘটনাক লৈ সৃষ্টি হৈছে ব্যাপক উদ্বেগৰ। শুকুৰবাবে পুৱাৰ ভাগত উত্তৰ পশ্চিম দিল্লীৰ পৰা মাংগোলপুৰী এলেকাৰ পৰা ডিঙি কটা মৃতদেহটো উদ্ধাৰ কৰা হয়। জানিব পৰা মতে এটা বেগৰ ভিতৰত ভৰাই থোৱা মৃতদেহটো ১৭বছৰীয়া এজন কিশোৰৰ। বৃহস্পতিবাৰৰ পৰা কিশোৰজন সন্ধানহীন হৈ আছিল। দিল্লীৰ ৰোহিনী এলেকাৰ পৰা বৃহস্পতিবাৰে নিশা সন্ধানহীন হৈছিল কিশোৰজন। তেওঁৰ বিচাৰ-খোঁচাৰ চলি থকাৰ মাজতে আজি পুৱা প্ৰায় ৭বজাত মৃতদেহটোৰ বিষয়ে অৱগত হয় দিল্লী আৰক্ষী।  দিল্লী আৰক্ষীৰ আউটাৰ এলেকাৰ আয়ুক্ত সমীৰ শৰ্মাই প্ৰকাশ কৰে যে, মংগোলপুৰীৰ মূল পথৰ সমীপত থকা পীৰ বাবা মাজাৰৰ সমীপত এটা অচিনাক্ত মৃতদেহ উদ্ধাৰ হৈছিল। ডিঙি কটা অৱস্থাত মৃতদেহটো উদ্ধাৰ হয়। মৃতদেহটো এটা বেঙুণীয়া ৰঙৰ ট্ৰেভেল বেগৰ ভিতৰত ভৰাই থোৱা আছিল। তাৰ পাছত সমীপৰ সকলো আৰক্ষী থানাকে সন্ধানহীন লোক সম্পৰ্কীয় অভিযোগৰ বিচাৰ-খোচাৰ কৰিবলৈ নিৰ্দেশ দিয়া হয়। তাৰ পাছচতে মৃতদেহটো ৰোহিনী ছেক্টৰ-১ৰ বাসিন্দা কিশোৰজনৰ বুলি নিশ্চিত কৰা হয়। এই তথ্যৰ আধাৰতে ৰোহিণী আৰক্ষী থানাত অপহৰণ আৰু হত্যাৰ গোচৰ ৰুজু কৰা হৈছে আৰু আৰক্ষীয়ে তদন্ত প্ৰক্ৰিয়া অব্যাহত ৰাখিছে।