বৰ্ষটোৰ সবাতোকৈ জাৰৰ নিশা কটালে দিল্লীবাসীয়ে

ডিজিটেল ডেস্ক : ঠেঁতুৱৈ ধৰা জাৰত এতিয়া কঁপিছে দিল্লীবাসী৷ ঘন কুঁৱলীৰ চাদৰে আৱৰি ৰখা ৰাজধানী দিল্লীত হঠাৎ বৃদ্ধি পাইছে জাৰৰ প্ৰকোপ৷ আজি পুৱা ৮.৩ ডিগ্ৰী ছেলছিয়াছলৈ নামি অহা উষ্ণতাই দিল্লীত এই সময়ছোৱাত সবাতোকৈ ঠাণ্ডাৰ দিন হিচাপে জানিব পৰা গ’ল৷ কিছুদিন আগৰলৈকে দিল্লীত বায়ু প্ৰদূষণৰ হাৰ অত্যধিক বৃদ্ধি পাই ডাঠ কুঁৱলীৰ এক আচ্ছাদনৰ দৰে অৱস্থাৰ সৃষ্টি কৰাৰ পাছতে পাছতে এতিয়া শীতৰ কুঁৱলীয়ে আৱৰি ৰাখিছে দিল্লীবাসীক৷

দিল্লীৰ বতৰ বিজ্ঞান কেন্দ্ৰই জনোৱা মতে শুকুৰবাৰলৈকে দিল্লীত ২৩৭ ডিগ্ৰী ছেলছিয়াছ চলি আছিল উষ্ণতা যদিও হঠাতে শুকুৰবাৰৰ নিশাই যথেষ্ট হ্ৰাস পাই আহিল মাত্ৰা৷ এইবৰ্ষত দিল্লীৰ উষ্ণতা ৯ ডিগ্ৰীলৈ নামিছিল যদিও কালি নিশাৰ মাত্ৰা সবাতোকৈ কম বুলি জানিবলৈ দিয়ে বিভাগীয় কৰ্তৃপক্ষই৷

ইপিনে দেৱালীৰ পাছৰ পৰাই হঠাতে বৃদ্ধি পোৱা বায়ু প্ৰদূষণে স্তব্ধ কৰিছিল দিল্লীবাসীৰ জনজীৱন৷ প্ৰায় দুসপ্তাহ বায়ু প্ৰদূষণৰ মাত্ৰা ইমানেই বৃদ্ধি পাইছিল যে, বিদ্যালয়, কলেজৰ বা অন্যান্য কাম-কাজ বন্ধ কৰি দিব লগা অৱস্থাত আহি পৰিছিল৷ ক’ভিডৰ পাছতে যেন বায়ু প্ৰদূষণৰ এক লকডাউনৰ পৰিৱেশহে বিৰাজ কৰিছিল৷ অৱশ্যে বৰ্তমানেও দিল্লীৰ বায়ু প্ৰদূষণৰ মাত্ৰা উন্নত হোৱা নাই যদিও পূৰ্বৰ তুলনাত যথেষ্ট নিয়ন্ত্ৰণলৈ আহিছে৷