কাছাৰৰ গুমড়াত বিপুল পৰিমাণৰ ড্ৰাগছ জব্দ, চাৰিজনক আটক

ডিজিটেল ডেস্ক: মাদকবিৰোধী বিশেষ অভিযানত ডাঙৰ সাফল্য লাভ কৰিছে কাছাৰৰ গুমড়া আৰক্ষীয়ে। গোপন সূত্ৰত লাভ কৰা তথ্যৰ ভিত্তিত চলোৱা তালাচীত এখন অল্টো গাড়ীৰ পৰা বিপুল পৰিমাণৰ সন্দেহজনক মাদকদ্ৰব্য জব্দ কৰা হয় আৰু চাৰিজন লোকক আটক কৰা হয়।

আৰক্ষী সূত্ৰে জনোৱা মতে, এমএল–০৯–৭০২৮ নম্বৰৰ অল্টো গাড়ীখন সন্দেহৰ ভিত্তিত ৰখাই তালাচী চলোৱা হয়। তালাচীৰ সময়ত গাড়ীৰ ভিতৰৰ পৰা ২২৮টা কোটাত সংৰক্ষিত প্ৰায় ৩২ গ্ৰাম সন্দেহজনক ড্ৰাগছ উদ্ধাৰ কৰা হয়। লগে লগে গাড়ীত থকা চাৰিজনক আটক কৰা হয়।

আটকাধীন লোকসকল হৈছে— ৰাজন দাস, ছাইদুল উদ্দিন, মইন উদ্দিন আৰু ফকৰুল ইছলাম। প্ৰাথমিকভাৱে আৰক্ষীৰ ধাৰণা, ধৃতসকল সংগবদ্ধভাৱে মাদক সৰবৰাহ চক্ৰৰ সৈতে জড়িত। তেওঁলোকক গুমড়া আৰক্ষী অনুসন্ধান কেন্দ্ৰলৈ লৈ গৈ সোধপোছ চলোৱা হৈছে।

এই চক্ৰটোৰ সৈতে আন কোন কোন জড়িত আছে আৰু মাদকদ্ৰব্য ক’ৰ পৰা আনিছিল আৰু ক’ত সৰবৰাহ কৰাৰ পৰিকল্পনা আছিল সেয়া আৰক্ষীয়ে তদন্ত কৰি আছে। ঘটনাটোক লৈ সমগ্ৰ অঞ্চলটোত চাঞ্চল্যৰ সৃষ্টি হৈছে।