কাছাৰত ভয়ংকৰ পথ দুর্ঘটনাত মহিলাৰ মৃত্যু; অন্তঃসত্বা মহিলাসহ দুই যুৱক আহত

ডিজিটেল ডেস্ক: কাছাৰৰ লক্ষীপুৰত নিশা ভয়ংকৰ পথ দুর্ঘটনা সংঘটিত হৈছে। কান্তিগাঁৱত দুর্ঘটনাত নিহত এগৰাকী মহিলা। 

দুর্ঘটনা আহত হৈছে এগৰাকী অন্তঃসত্বা মহিলা আৰু দুগৰাকী যুৱক। আহত কেইজনক শিলচৰ মেডিকেল কলেজ হাস্পতাললৈ প্রেৰণ কৰা হৈছে। 

নিহত মহিলাগৰাকীৰ নাম মঞ্জু ফুলমালি। আহত তিনিগৰাকী হৈছে অন্তঃসত্বা মহিলা অনিমা ফুলমালি আৰু দুই যুৱক ক্ৰমে জগৎ ফুলমালি আৰু বিকাশ বাউৰি।

জানিব পৰা মতে, নিশা চিকিৎসাৰ বাবে অন্তঃসত্বা মহিলা অনিমাক হাস্পতাললৈ অটোৰিক্সাৰে লৈ গৈছিল পৰিয়ালে। গৈ থাকোতে কান্তিগাঁৱত এখন ডাম্পাৰৰ খুন্দাত বাগৰি পৰে অটো ৰিক্সাখন। ইয়াৰ ফলত মৃত্যু হয় মঞ্জু নামৰ মহিলাগৰাকীৰ আৰু আহত হয় অন্তঃসত্বা মহিলা অনিমা আৰু দুই যুৱক বিকাশ আৰু জগৎ।

অভিযোগ অনুসৰি, তেওঁলোকক প্রথমে লৈ যোৱা হৈছিল ওচৰৰ ছোটমামদা মডেল হাস্পতাললৈ। কিন্তু তাত নাছিল এম্বুলেন্স আৰু উপযুক্ত চিকিৎসা ব্যৱস্থা। যাৰবাবে সৃষ্টি হয় উত্তেজনাৰ। পিছত দিয়া হয় এম্বুলেন্স পৰিসেৱা। ততাতৈয়াকৈ চিকিৎসা আৰু এম্বুলেন্স পৰিসেৱা পালে নিহত মহিলাগৰাকীৰ প্রাণ ৰক্ষা হলহেঁতেন বুলি সন্দেহ প্রত্যক্ষদর্শীসকলৰ।

লক্ষীপুৰ আৰক্ষী ঘটনাস্থলীত উপস্থিত হৈ আৰম্ভ কৰে তদন্ত লগতে উদ্ধাৰ কৰে দুর্ঘটনাগ্রস্ত ডাম্পাৰ আৰু অটো ৰিক্সাখন।