যোৰহাটৰ ফ্লেটত ডকাইতিৰ ঘটনা; ৪ ডকাইতে চলালে লুটপাট

ডিজিটেল ডেস্ক: যোৰহাটৰ এটা ফ্লেটত শনিবাৰে নিশা সংঘটিত হোৱা ডকাইতিৰ ঘটনাই ব্যাপক চাঞ্চল্যৰ সৃষ্টি কৰিছে। যোৰহাট ন আলি উৰণ সেতুৰ কাষত থকা এ বি জি হাইট নামৰ ফ্লেটটোত সংঘটিত হয় এই ঘটনা। 

শনিবাৰে নিশা প্ৰায় ডেৰ বজাত উক্ত ফ্লেটটোত প্ৰৱেশ কৰে চাৰিজনীয়া এটা ডকাইতৰ দল। হাতে হাতে লাঠি আৰু বিভিন্ন লোহা জাতীয় অস্ত্ৰ লৈ ফ্লেটটোৰ পিছফালৰ পৰা প্ৰবেশ কৰে। যিকেইটা ফ্লেটত তলা বন্ধ আছিল সেইকেইটাক মূলত ডকাইতৰ দলটোৱে লক্ষ্য কৰি লয়। 

প্ৰথমে ফ্লেটটোৰ এ ব্লক , পিছত বি আৰু চি ব্লকৰ চাৰিটাকৈ কোঠাত অভিযান চলায়। ইয়াৰে তিনিটা কোঠাত ডকাইতৰ দলটোৱে প্ৰবেশ কৰি সোণৰ আ- অলংকাৰকে ধৰি বিভিন্ন সামগ্ৰী লৈ উধাও হয়। নিশা ডেৰ বজাৰ পৰা ৩-৪০ বজা পৰ্যন্ত ডকাইতৰ দলটোৱে ফ্লেটটোত লুটপাট চলায়।  

ডকাইতৰ দলটোৱে লুটপাট চলোৱাৰ সময়ত আৰক্ষীক আৱাসীয়ে খবৰ দিয়ে যদিও আৰক্ষী অহাৰ পূৰ্বেই দলটোৱে পলায়ন কৰে। ইতিমধ্যেই আৰক্ষীয়ে ফ্লেটটোৰ নিৰাপত্তাৰ দায়িত্বত থকা ব্যক্তিগৰাকীক সোধ পোচ কৰাৰ বাবে আটক কৰিছে আৰু ডকাইত কেইটাৰ ফটো চিচি টিভিৰ ফটো সংগ্ৰহ কৰি অভিযান অব্যাহত ৰাখিছে। যোৰহাটৰ ন আলিৰ দৰে এক শান্তিপূৰ্ণ এলেকাত সংঘটিত হোৱা এনে ঘটনাই অঞ্চলবাসীক শংকিত কৰি তুলিছে।