চাৰি অভিযুক্তক ভুৱা সংঘৰ্ষৰ জৰিয়তে হত্যা কৰা আৰক্ষী এতিয়া বিপদত, চলিব হত্যাৰ গোচৰ!

ডিজিটেল ডেস্ক : হায়দৰাবাদ এনকাউণ্টাৰ গোচৰ সন্দৰ্ভত এক বিস্ফোৰক তথ্য পোহৰলৈ আহিছে। এই বিতৰ্কিত ঘটনাৰ তদন্ত কৰি থকা ন্যায়িক আয়োগে চাৰিজন অভিযুক্তক আৰক্ষীয়ে কৰা এনকাউণ্টাৰ ভুৱা বুলি অভিহিত কৰিছে। আয়োগে ১০ জন আৰক্ষীৰ লোকৰ বিৰুদ্ধে হত্যাৰ গোচৰ চলাবলৈকো পৰামৰ্শ দিছে। উচ্চতম ন্যায়ালয়ে নিযুক্ত কৰা ন্যায়াধীশ শিৰপুৰকাৰ আয়োগৰ প্ৰতিবেদনত এই পৰামৰ্শ দিয়া হৈছে। আয়োগে তদন্তত লাভ কৰা তথ্য প্ৰকাশেৰে মন্তব্য কৰে যে অভিযুক্তই পিষ্টল কাঢ়ি লৈ পলাই যাবলৈ চেষ্টা কৰা বুলি আৰক্ষীয়ে কৰা দাবীক বিশ্বাস কৰিব নোৱাৰি। 

এই যুক্তিবোৰ প্ৰমাণৰ ওপৰত আধাৰিত নহয়। ন্যায়াধীশ ভি এছ শিৰপুৰকাৰ আয়োগে ইয়াৰ প্ৰতিবেদনত এনকাউণ্টাৰ সন্দৰ্ভত ভালেমান প্ৰশ্ন উত্থাপন কৰিছে। আয়োগে ইয়াৰ প্ৰতিবেদনত প্ৰকাশ কৰে যে, এনকাউণ্টাৰত নিহত চাৰিজন অভিযুক্তৰ ভিতৰত তিনিজন নাবালক আছিল। আয়োগে তদন্তৰ প্ৰতিবেদনত লগতে উল্লেখ কৰিছে যে, অভিযুক্তসকলক ইচ্ছাকৃতভাৱে এনেদৰে গুলীওৱা হৈছিলযাতে তেওঁলোকৰ মৃত্যু হয়। এই অপৰাধৰ বাবে ছইক লাল মধৰ, মহম্মদ চিৰাজুদ্দিন আৰু কোচেৰলা ৰবিকে ধৰি দহজন আৰক্ষীৰ লোকৰ বিৰুদ্ধে হত্যাৰ অপৰাধত অৰ্থাৎ ৩০২ নং ধাৰা অনুসৰি বিচাৰ চলোৱা উচিত। 

ইয়াৰ পূৰ্বে, উচ্চতম ন্যায়ালয়ে আজি স্পষ্ট কৰি দিয়ে যে হায়দৰাবাদ এনকাউণ্টাৰ গোচৰৰ ন্যায়িক তদন্তৰ প্ৰতিবেদন ৰাজহুৱা কৰা হ'ব। আদালতে তেলেংগানা চৰকাৰৰ প্ৰতিবেদনখন চীল কৰাৰ দাবী নাকচ কৰিছিল আৰু বিষয়টো তেলেংগানা উচ্চ ন্যায়ালয়লৈ ঘূৰাই পঠিয়াইছিল। দেশৰ মুখ্য ন্যায়াধীশ এন ভি ৰমনাই কৈছিল যে তদন্ত প্ৰতিবেদনৰ প্ৰতিলিপি আবেদনকাৰীসকলকো প্ৰদান কৰিব লাগে। এই প্ৰতিবেদন সন্দৰ্ভত গোপন কৰিবলগীয়া একো নাই। আয়োগে কাৰোবাক দোষী সাব্যস্ত কৰিছে, এতিয়া ৰাজ্যই এই সন্দৰ্ভত পদক্ষেপ গ্ৰহণ কৰিব লাগিব। আমি গোচৰটো উচ্চ ন্যায়ালয়লৈ প্ৰেৰণ কৰিছোঁ। সকলো তথ্য উচ্চ ন্যায়ালয়লৈ প্ৰেৰণ কৰিব লাগে আৰু উচ্চ ন্যায়ালয়ে প্ৰতিবেদনখন নিৰীক্ষণ কৰা উচিত। এইটো এটা ৰাজহুৱা অনুসন্ধান। প্ৰতিবেদনৰ বিষয়বস্তু প্ৰকাশ কৰিব লাগিব। প্ৰতিবেদনখন অহাৰ পাছত, ইয়াক প্ৰকাশ কৰা উচিত। 

২০১৯ চনৰ ২৭ নৱেম্বৰত এগৰাকী মহিলা পশু চিকিৎসকক চাৰিজন দুৰ্বৃত্তই অপহৰণ কৰি নিছিল আৰু যৌন নিৰ্যাতন চলাইছিল। মহিলা চিকিৎসকগৰাকীক পাছত হত্যা কৰা হৈছিল। আৰক্ষীয়ে সদৰি কৰিছিল যে অভিযুক্তকেইজনে পাছত মহিলাগৰাকীৰ মৃতদেহ জ্বলাই দিছিল। এই ঘটনাটোৰ বিষয়ে পোহৰলৈ অহাৰ পাছতে তীব্ৰ ক্ষোভৰ সৃষ্টি হয় আৰু জনগণ বিক্ষুব্ধ হৈ উঠে। তাৰ পাছত আৰক্ষীয়ে গ্ৰেপ্তাক কৰা চাৰিজন অভিযুক্ত হায়দৰাবাদৰ ওচৰৰ ৪৪ নম্বৰৰ ৰাষ্ট্ৰীয় ঘাইপথত এটা সংঘৰ্ষত নিহত হোৱা বুলি দাবী কৰা হৈছিল। আৰক্ষীয়ে দাবী কৰিছিল যে ২৭ বছৰীয়া পশু চিকিৎসা চিকিৎসকজনৰ অগ্নিদগ্ধ মৃতদেহ একেটা স্থানতে উদ্ধাৰ হৈছিল৷ পাছত উচ্চতম ন্যায়ালয়ত দাখিল কৰা দুখন পৃথক আৱেদনত দাবী কৰা হৈছিল যে আৰক্ষীৰ এই এনকাউণ্টাৰ ভুৱা আছিল আৰু ঘটনাটোৰ সৈতে জড়িত আৰক্ষী বিষয়াসকলৰ বিৰুদ্ধে এখন এজাহাৰ দাখিল কৰা উচিত৷