ডিজিটেল ডেস্ক: ইজৰাইলৰ এটা স্পাই ছফটওৱেৰ পেগাছাছক লৈ বিশ্বজুৰি বিতৰ্কৰ সৃষ্টি হৈছিল। এই বিতৰ্কত সোমাই পৰিছিল ভাৰতবৰ্ষও। সংবাদ মাধ্যমৰ প্ৰতিবেদনত প্ৰকাশ পোৱা তথ্য অনুসৰি অসমৰ দুজন ব্যক্তিও আছিল পেগাছাছৰ লক্ষ্য।
এই বিতৰ্কই দেশজুৰি তীব্ৰ চাঞ্চল্যৰ সৃষ্টি কৰিছিল। বিশেষকৈ চৰকাৰৰ বিৰোধিতা কৰা নেতা, সাংবাদিক, সমাজকৰ্মীৰ ফোন পেগাছাছৰ লক্ষ্য হৈ পৰাৰ পাছত সৰ্বত্ৰে সমালোচিত হৈছিল কেন্দ্ৰীয় চৰকাৰ। পাছলৈ এই বিষয়ে তদন্তৰ দাবী উঠিছিল বিভিন্ন মহলত। কিয়নো ইজৰাইলৰ এটা ব্যক্তিগত কোম্পানীৰ নিয়ন্ত্ৰণাধীন ছফটওৱেৰটো যথেষ্ট ব্যয়বহুল বুলি প্ৰতিবেদনত প্ৰকাশ পাইছিল। যি ব্যয় বহন কৰাটো কোনো ব্যক্তিগত কোম্পানী বা ব্যক্তি বিশেষৰ বাবে সম্ভৱ নহয়। তেনেহ’লে কোন চুক্তিবদ্ধ হৈছিল ইজৰাইলী কোম্পানীৰ সৈতে?
এই সম্পৰ্কে তদন্ত কৰিবলৈ দেশৰ শীৰ্ষ আদালতে বিগত বছৰৰ অক্টোবৰত নিৰ্দেশনা প্ৰদান কৰিছিল। কিন্তু দেশৰ নিৰাপত্তাৰ প্ৰশ্ন জড়িত হৈ থকা বিষয়টো সন্দৰ্ভত আজিলৈকে তদন্তৰ প্ৰতিবেদন দাখিল কৰা নহ’ল। শুকুৰবাৰে অনুষ্ঠিত আদালতৰ শুনানিৰ পাছত কাৰিকৰী সমিতিৰ দাবীৰ প্ৰতি লক্ষ্য ৰাখি আদালতে পুনৰ ৪ সপ্তাহৰ সময়সীমা বৃদ্ধি কৰিছে। লগতে কাৰিকৰী সমিতিক দেশৰ শীৰ্ষ আদালতে তদন্ত ক্ষিপ্ৰ কৰি তুলিবলৈ নিৰ্দেশনা দিছে। আশা কৰা মতে অহা ২০ জুনৰ ভিতৰত উচ্চতম ন্যায়ালয়ত চূড়ান্ত প্ৰতিবেদন দাখিল কৰা হ’ব।
Continue Reading
