নিবনুৱাৰ কটা ঘাত বিজেপিৰ কলাখাৰ, ছয় বছৰত চাকৰি হেৰাল ৭২ হাজাৰ

ডিজিটেল ডেস্ক : ২০১৪ চনত দেশৰ জনতাক বিশেষকৈ যুৱ সমাজক পৰিৱৰ্তনৰ প্ৰতিশ্ৰুতি দি, অৰ্থনৈতিক উন্নয়নৰ সপোন দেখুৱাই শাসনৰ বাঘজৰী কুক্ষিগত কৰিছিল গেৰুৱা বাহিনীয়ে। প্ৰধান মন্ত্ৰী পদত অধিষ্ঠিত হৈছিল নৰেন্দ্ৰ মোদী। ক্ষমতা হস্তগত কৰাৰ পাছত অতি কৌশলেৰে আৰু সংগোপনে বিজেপিয়ে সলনি কৰে নীতি। পুঁজিপতি ব্যৱসায়িক গোষ্ঠীৰে আৰম্ভ হয় মিতিৰালি। ধৰ্মান্ধতা সিঁচি দিয়া হয় জনতাৰ মাজত।

 ৰাষ্ট্ৰীয়তাবাদ, হিন্দুত্ব আৰু সনাতনী সভ্যতাৰ প্ৰসংগ ধাৰাবাহিকভাৱে বাৰম্বাৰ উত্থাপন কৰি যুৱক-যুৱতীসকলৰ মাজত সৃষ্টি কৰা হয় ধৰ্মীয় আৱেগ। দেশৰ গৰিষ্ঠসংখ্যক লোক বিশেষকৈ যুৱসমাজ ব্যস্ত হৈ পৰে বিজেপিৰ ৰাজনৈতিক 'এজেণ্ডা'ত। সেই সুযোগতে ভাৰতৰ যুৱ শক্তিক বিজেপিৰ ওপৰত নিৰ্ভৰশীল কৰি ৰাখিবলৈ পৰিকল্পনা যুগুত কৰে প্ৰধানমন্ত্ৰী নৰেন্দ্ৰ মোদী নেতৃত্বতাধীন এনডিএ চৰকাৰে। শেহতীয়াকৈ ফাদিল হৈছে নিবনুৱাবিৰোধী বিজেপি চৰকাৰৰ ভয়ংকৰ ষড়যন্ত্ৰ। কিন্তু কি সেই ষড়যন্ত্ৰ। দেশৰ যুৱক-যুৱতীসকলৰ বাবে নতুন কৰ্মসংস্থাপন সৃষ্টি কৰাতো দূৰৰ কথা আনকি চৰকাৰী বিভাগত থকা চাকৰিসমূহো অৰ্থাৎ পদসমূহো ক্ৰমাৎ বিলুপ্ত কৰা হৈছে। তাৰ এক উদাহৰণ হ'ল-যোৱা ছবছৰত কেৱল ৰেল বিভাগত ৭২,০০০ হাজাৰ পদ বিলুপ্ত কৰা হৈছে। এই পদসমূহ ‘চি’ আৰু ‘ডি’ গ্ৰুপৰ। পৰিণতিত ৰে'ল বিভাগৰ মুঠ ৭২ হাজাৰ তৃতীয় আৰু চতুৰ্থ বৰ্গৰ চাকৰিত নিযুক্তি লাভ কৰাৰ পৰা দেশৰ নিবনুৱা যুৱক-যুৱতীসকল বঞ্চিত হ'ল।

 ইতিমধ্যে এই বিষয়টোৰ ওপৰত চৰকাৰৰ এক স্পষ্টিকৰণ বিচাৰি ৰে'ল মন্ত্ৰীলৈ পত্ৰ প্ৰেৰণ কৰিছে ৰাজ্যসভাৰ সাংসদ ড০ ভি শিৱদাসনে। ভাৰতৰ দৰে এখন কল্যাণকামী ৰাষ্ট্ৰত বিজেপি চৰকাৰৰ এনে সিদ্ধান্ত গৰিহণাৰ যোগ্য। বিজেপি চৰকাৰৰ এই কাৰ্যক কটা ঘাত কলাখাৰ ঢালি আহত লোকক অধিক যন্ত্ৰণা দিয়াৰ দৰে নিৰ্মম কাৰ্য নহয় নে? দেশৰ কোটি কোটি নিবনুৱা যুৱক-যুৱতীয়ে কৰ্মসংস্থাপন বিচাৰি হাবাথুৰি খাইছে। আৰু বিজেপিয়ে সংস্থাপনৰ দুৱাৰ মাৰি ৰং চাব লাগিছে দেশৰ জনতাৰ।