চাইকেল চলাই সন্তান প্ৰসৱৰ বাবে হাস্পতালত উপস্থিত সাংসদ

ডিজিটেল ডেস্ক: প্ৰতিগৰাকী মহিলাৰ বাবে আটাইতকৈ গৌৰৱৰ ক্ষণ হৈছে মাতৃত্ব অৰ্জনৰ দিনটো৷ অনেক সুখ-দুখৰ সাক্ষী হোৱা প্ৰতিগৰাকী মাতৃয়ে এই সময়ছোৱা বিশেষ আদৰ-যত্নৰ মাজৰে পাৰ কৰে৷ কিন্তু পৰিস্থিতিয়ে কোনসময়ত কেনে ৰূপ লয়, সেয়া কোনেও নাজানে৷ এগৰাকী সাংসদে সন্তান প্ৰসৱ কৰি এতিয়া বিশ্বজুৰি চৰ্চা লাভ কৰিছে সংবাদ মাধ্যমত৷

নিউজিলেণ্ডৰ সাংসদ জুলি আন্নে গেণ্টাৰে সন্তানটি জন্ম দিয়াৰ মাত্র এঘণ্টাৰ পূর্বে নিজেই চাইকেল চলাই আহি হাস্পতালত ভর্তি হয়৷ সন্তানটি জন্ম দিয়াৰ পাছতে সাংসদগৰাকীয়ে কয় যে চাইকেল চলোৱাৰ মুহূর্তত তেওঁ প্রসৱ বেদনা অনুভৱ কৰিব বুলি ভবা নাছিল৷ গ্রীন পার্টীৰ মুখপাত্র গেণ্টাৰে তিনি বছৰৰ পূর্বেও দেশখনৰ এগৰাকী মন্ত্রী হৈ থকাৰ সময়তো চাইকেল চলাই হাস্পতালত সন্তান জন্ম দিবলৈ উপস্থিত হৈছিল৷

উল্লেখ্য যে ৪১ বছৰীয়া গেণ্টাৰ হৈছে চাইকেল চলোৱাৰ সপক্ষে বিভিন্ন সময়ত যুক্তি দর্শাই অহা এগৰাকী নেত্রী৷ আমেৰিকাত জন্মগ্রহণ কৰা গেণ্টাৰে পূর্বৰে পৰা তেওঁ আৰু তেওঁৰ স্বামীয়ে চাইকেল চলাই ভাল পাইছিল বুলি উল্লেখ কৰে৷