ভাৰত এতিয়াও চীনৰ বাবে এখন বজাৰ! বৃদ্ধি ঔষধৰ আমদানি

ডিজিটেল ডেস্ক : চীনক বাদ দি চলিব নোৱাৰে নেকি ভাৰত৷ চীনা সামগ্ৰী বৰ্জন কৰা সিদ্ধান্ত লোৱাৰ পাছতো ভাৰতে চীনৰ ওপৰত নিৰ্ভৰ কৰিবলগীয়া হৈছে কিয়? আগ্ৰাহী চীনে ভাৰতীয় বজাৰৰ অধিকাংশ সামগ্ৰীতে প্ৰভুত্ব বিস্তাৰ কৰাৰ পাছতে এইবাৰ জীৱনদায়িনী ঔষধৰ ওপৰতো চীনৰ ওপৰত নিৰ্ভৰ হৈছে ভাৰত৷ শেহতীয়াকৈ জানিব পৰা মতে দেশৰ ফাৰ্মাচিউটিকেল খণ্ডৰ বাবে পিএলআই আচঁনি ঘোষণাৰ জৰিয়তে চৰকাৰে ঘৰুৱাভাৱে ঔষধৰ উৎপাদনৰ বিষয়টোত গুৰুত্ব আৰোপ কৰিছিল যদিও চীনৰ পৰা ভাৰতলৈ ঔষধৰ আমদানী বৃদ্ধি পোৱাৰ তথ্য প্ৰকাশ পাইছে৷

চুবুৰীয়া ৰাষ্ট্ৰখনৰ পৰা ভাৰতলৈ ঔষধ, চিকিৎসা সা-সৰঞ্জাম আমদানীৰ পৰিমাণ পূৰ্বতকৈ ৭৫ শতাংশ বৃদ্ধি পাইছে৷ ইয়াৰ পৰাই প্ৰমাণিত হৈছে যে ভাৰতে বৰ্তমানেও চীনক এৰাই চলিব পৰা নাই সম্পূৰ্ণৰূপে৷ উল্লেখ্য যে ২০২০-২১ বৰ্ষত ভাৰতলৈ সৰ্বাধিক চিকিৎসা সঁজুলি ৰপ্তানী কৰা দেশ হিচাপে পৰিগণিত হৈছিল চীন৷ ইয়াৰ পূৰ্বে শীৰ্ষ স্থানত আমেৰিকা আৰু জাৰ্মানী আছিল যদিও শেহতীয়া প্ৰকাশিত তথ্যত চীনে লাভ কৰিছে শীৰ্ষস্থান৷

স্মৰ্তব্য যে প্ৰধানমন্ত্ৰী নৰেন্দ্ৰ মোদীৰ 'মেক ইন ইণ্ডিয়া' আচঁনিৰ জৰিয়তে ঘৰুৱাভাৱে উৎপাদিত সামগ্ৰী বৃদ্ধি আৰু ব্যৱহাৰ ক্ষেত্ৰত গুৰুত্ব দিয়াৰ পৰিকল্পনা কৰিলেও কিন্তু ইয়াৰ বিপৰীত ছবিহে পৰিলক্ষিত হৈছে৷ ক'ভিডকালীন পৰিস্থিতিত বিশেষকৈ অক্সিমিটাৰ, ডিজিটেল থাৰ্ম'মিটাৰকে ধৰি বহুকেইবিধ সামগ্ৰী আমদানী কৰিছে ভাৰতে৷