চাইকেল চলালেও দিব লাগিব নেকি টেক্স? চকীদাৰৰ ঘৰলৈ আহিল ১.৫১ লাখ টকাৰ জাননী

ডিজিটেল ডেস্কঃ আপুনি এতিয়ালৈকে বাইক বা গাড়ী চালকৰ পৰা কৰ বা টেক্স সংগ্ৰহ কৰাৰ কথা শুনিছে কিন্তু কেতিয়াবা চাইকেল চলোৱা মানুহৰ পৰাও কৰ সংগ্ৰহ কৰাৰ কথা শুনিছেনে। উত্তৰ প্ৰদেশৰ ঔৰিয়া জিলাত সংঘটিত হৈছে এক আজৱ ঘটনা। উত্তৰ প্ৰদেশৰ Regional Transport Office-এ এজন চাইকেল আৰোহীক ১.৫১ লাখ টকা পথ কৰ পৰিশোধ কৰিবলৈ জাননী প্ৰেৰণ কৰিছে।

এজন ১৭ বছৰীয়া ল'ৰালৈ আহিছে এই জাননী। ল'ৰাজনৰ নাম সুধীৰ চন্দ্ৰ। সুধীৰৰ পিতৃ সুৰেশ চন্দ্ৰই এখন ধৰ্মশালাত চকীদাৰৰ কাম কৰে। তেওঁলোকৰ ঘৰখনত বাইক নাই, গাড়ী নাই। দুই পিতা-পু্ত্ৰই কেৱল চাইকেল চলায়। ইয়াৰ পাছতো তেওঁলোকৰ ঘৰলৈ ১,৫১,১৪০ লাখ টকাৰ পথ কৰ পৰিশোধ কৰিবলৈ জাননী প্ৰেৰণ কৰাত পৰিয়ালটোত হাহাকাৰৰ সৃষ্টি হয়।

সুৰেশ চন্দ্ৰই দুদিন আগতে ডাকযোগে জাননীখন পাইছিল। জাননীখন ইংৰাজীত লিখা বাবে চুবুৰীয়াক জাননীখন পঢ়ি শুনাই বুজাই দিবলৈ কয় সুৰেশ চন্দ্ৰই। চুবুৰীয়াই জাননীখন পঢ়ি বুজাই দিয়ে যে তেওঁৰ ১৭ বছৰীয়া পুত্ৰ সুধীৰক গাড়ী কৰ নিদিয়া বাবে জৰিমনা বিহা হৈছে। জাননীখনে ২০১৪ জুনৰ পৰা ছেপ্টেম্বৰ ২০২১ লৈ মটৰ বাহন কৰ পৰিশোধ কৰিবলৈ নিৰ্দেশ দিছে।

সুৰেশে কৈছিল যে তেওঁৰ ওচৰত কেৱল এখন চাইকেল আছে। পুত্ৰৰ চাইকেলো নাই। প্ৰয়োজন পৰিলে তেওঁৰ চাইকেলখনকে পুত্ৰই চলায়, তেনেস্থলত এনে এখন জাননী তেওঁৰ ঘৰলৈ কিয় আহিল? বিষয়টোৰ সন্দৰ্ভত Regional Transport Officeৰ প্ৰশাসক অশোক কুমাৰক অৱগত কৰোৱা হয়। অশোক কুমাৰে কয় যে এনে হোৱা উচিত নহয়। গোটেই বিষয়টো বিবেচনা কৰা হ'ব আৰু সঠিকভাৱে তদন্ত আগবঢ়াই নিয়া হব। যিয়ে এই ভুল কৰিছে তেওঁৰ বিৰুদ্ধে ব্যৱস্থা লোৱা হ'ব।

আৰু পঢ়কঃ আজৱ খবৰ! অসমৰ এখন গাঁৱত ছাগলীয়ে জন্ম দিলে মানুহ আকৃতিৰ পোৱালি