ডিজিটেল ডেস্কঃ আমি সততে ৰূপালী পৰ্দাত দেখিবলৈ পোৱা চেলিব্ৰিটী সকলৰ নানা দিশ অনুকৰণ কৰিবলৈ প্ৰায়ে চেষ্টা কৰো। ছলমানৰ দৰে বাহু, শ্বাহৰূখৰ দৰে হেয়াৰ ষ্টাইল, দীপিকাৰ দৰে হাঁহি, কেটৰিনাৰ লেখীয়া ক্ষীণকায় শৰীৰ এটা পাবলৈ কাৰনো মনত হেঁপাহ নাজাগিব! পিছে এই হেঁপাহ তথা অত্যুত্সাহে সময়ত কাল হৈ পৰা দেখিবলৈ পোৱা যায়। মডেল জেনিফাৰ পেম্পলোনাৰ বিষয়ে আপোনালোকে নিশ্চয় অৱগত। নিজৰ শৰীৰ অৱয়বৰ ৰূপান্তৰৰে একপ্ৰকাৰ ইতিহাসে ৰচিছে জেনিফাৰে।
জীৱনৰ এটা সময়ত কিম কাৰ্দাছিয়ানৰ ৰূপে বিমোহিত কৰি তুলিছিল জেনিফাৰ পেম্পলোনাক। জেনিফাৰে বিচাৰিছিল কিম কাৰ্দাছিয়ানৰ দৰে দেখিবলৈ হওক তেওঁ। প্ৰত্যাশা অনুসৰি নিজৰ স্বাভাৱিক ৰূপৰ পৰিৱৰ্তে জেনিফাৰ ব্যস্ত হৈ পৰিছিল ৰূপান্তৰৰ পৃথিৱীখনত। ইয়াৰ বাবে ৪০টা কচমেটিক অপাৰেচনৰ মাজেৰে পাৰ হ’বলগীয়া হৈছিল জেনিফাৰে। কেৱল মাত্ৰ কাৰ্দিছিয়ানৰ ৰূপ লাভৰ বিনিময়ত ব্যয় হৈছিল লক্ষ লক্ষ টকা। প্ৰায় ৭ লাখ ডলাৰ। ভাৰতীয় মুদ্ৰাত এই পৰিমাণ ৪ কোটি ৬ লাখ ৫৪ হাজাৰ ৩০০ টকা! শুনিবলৈ আশ্চৰ্যকৰ যেন লাগিলেও এয়াই সত্য।
যিটো সময়ত দেশৰ ৰাজভঁৰাল উদং বুলি সততে সংবাদ শিৰোনাম দখল কৰা দেখিবলৈ পাওঁ, যিটো সময়ত দেশৰ অৰ্থনীতি পেণ্ডুলামৰ দৰে এক গভীৰ অনিশ্চয়তাৰ মাজেৰে গতি কৰিছে, যিটো সময়ত খাবলৈ নাপাই বিনিদ্ৰ ৰজনী কটাবলগীয়া হৈছে দেশৰ সহস্ৰ নাগৰিকে, তেনে সময়তে কিন্তু কেৱল মাত্ৰ ৰূপ ৰূপান্তৰৰ নামতে এগৰাকী মডেলে এইদৰে কোটি কোটি টকা হাঁহিমুখে উৰুৱাব পাৰিছে। স্বাভাৱিকতে, ভাবিব লগীয়া নহয়নে কথাবোৰ?
Continue Reading
