ডিজিটেল ডেস্কঃ সাধাৰণতে চেলুনত নাপিতসকলে গ্ৰাহকৰ সময়খিনি সুন্দৰকৈ পাৰ হ'বৰ বাবে টিভি লগায় ৰাখে বা আন কিছুমানে ননষ্টপ গান বজাই ৰাখে আৰু আন কিছুমানে একো নকৰে। এইখিনিতে এজন অসাধাৰণ নাপিতে সকলোৰে দৃষ্টি আকৰ্ষণ কৰিছে। নাপিতজনে তেওঁৰ চেলনুত এটা সৰু পুথিভঁৰাল স্থাপন কৰিছে। বহুতো সুন্দৰ সুন্দৰ কিতাপেৰে তেওঁৰ পুথিভঁৰালটো ভৰি আছে।
গ্ৰাহকসকলৰ মাজত কিতাপ পঢ়াৰ অভ্যাস গঢ়ি তুলিবৰ বাবে নাপিতজনে এই পদক্ষেপ গ্ৰহণ কৰিছে। এই ব্যতিক্ৰমী চেলুনখন তামিলনাডুৰ থুথুকুডিত অৱস্থিত। অসাধাৰণ নাপিতজনৰ নাম পণ মৰিয়াপ্পান। টিভি, মডেলৰ পোষ্টাৰ, কোলাহলপূৰ্ণ গীতৰ পৰা আঁতৰত নিজৰ চেলুনত এটা সৰু পুথিভঁৰাল স্থাপন কৰা তামিলনাডুৰ এই নাপিতগৰাকীক লৈ ছ’চিয়েল মিডিয়াত ব্যাপক চৰ্চা চলিছে৷
পণৰ পুথিভঁৰালত প্ৰায় ১৫০০ কিতাপ আছে৷ উল্লেখযোগ্য যে কোনো গ্ৰাহকে যদি এই চেলুনত কিতাপ পঢ়ে তেন্তে গ্ৰাহকজনে চুলি কটাৰ ক্ষেত্ৰত ৩০% ৰেহাই পায়। আই এ এছ বিষয়া অৱনীশ শৰণে এই কথা ছ'চিয়েল মিডিয়াত শ্বেয়াৰ কৰাৰ লগে সমগ্ৰ বিষয়টো ভাইৰেল হৈ পৰে।
এতিয়া চেলুনখনলৈ নতুন নতুন গ্ৰাহকৰ আগমন ঘটিছে। ছ'চিয়েল মিডিয়াত সকলোৱে পণ মৰিয়াপ্পানক প্ৰশংসাৰে উপচাই পেলাইছে। পণ মৰিয়াপ্পানৰ পদক্ষেপৰ পৰা বুজিব পাৰি যে সৰু সৰু কামৰ পৰাই সমাজত ডাঙৰ ডাঙৰ পৰিৱৰ্তন আনিব পাৰি।
Continue Reading
