পত্নীয়ে লাভ কৰিলে চৰকাৰী চাকৰি, ঈৰ্ষাত জ্বলি-পুৰি মৰা স্বামীয়ে কাটি পেলালে পত্নীৰ হাত!

 ঘটনাটো ঘটিছে পশ্চিমবংগৰ পূব বৰ্ধমান জিলাৰ কেতুগ্ৰামত। স্বামী  শ্বৰিফুল শ্বেখৰ আক্ৰমণত হাত এখন হেৰুওৱা  

 ৰেণু খাতুনক সংকটজনক অৱস্থাত চিকিৎসালয়ত ভৰ্তি কৰোৱা হৈছে। ইপিনে অভিযুক্তজনৰ স্বামী শ্বৰিফুল শ্বেখ আৰু তেওঁৰ পৰিয়ালৰ সদস্যসকল ঘটনাটোৰ পিছৰে পৰা পলাতক হৈ আছে।

কেতুগ্ৰামৰ কোজলচা গাঁৱত ৰেণু খাতুনৰ শহুৰেকৰ ঘৰ।ৰেণুৱে ২০১৭ চনৰ অক্টোবৰত কোজলচা গাঁৱৰ বাসিন্দা চিৰাজ শ্বেখৰ একমাত্ৰ পুত্ৰ শ্বেৰ মহম্মদ শ্বেখ ওৰফে শ্বৰিফুলৰ সৈতে বিবাহ পাশত আৱদ্ধ হৈছিল।শ্বৰিফুলে বিশেষ কোনো কাম কৰা নাছিল৷ ৰেণুৰ দেউতাক আজিজুল হকে জানিবলৈ দিয়া মতে জীয়েকৰ বিয়াত তেওঁ যৌতুক হিচাপে নগদ ১ লাখ টকা, গহনা, এখন স্কুটি আৰু আনুষঙ্গিক সামগ্ৰী দিছিল।

ৰেণুৱে বিয়াৰ আগতেই  নাৰ্চিং বিষয়ত প্ৰশিক্ষণ লৈ থৈছিল। কিছুদিন ধৰি ৰেণুৱে দুৰ্গাপুৰৰ এখন ব্যক্তিগত চিকিৎসালয়ত নাৰ্ছ হিচাপে কাম কৰি আছিল। তাৰ পিছতে তেওঁ চৰকাৰী চাকৰিৰ সাক্ষাৎকাৰত  উত্তীৰ্ণ হয়। কেইদিনমান আগতে, তেওঁ চূড়ান্ত পৰীক্ষাতো উত্তীৰ্ণ হৈছিল আৰু চৰকাৰী চাকৰি লাভ কৰিছিল। দুৰ্গাপুৰৰ ব্যক্তিগত চিকিৎসালয়ত নাৰ্ছ হিচাবে কাম কৰি থাকোতে ৰেণু আৰু শ্বৰিফুলৰ সংসাৰ ঠিকেই চলিছিল৷ কিন্তু ৰেণুৱে চৰকাৰী চাকৰি লাভ কৰাৰ পিছত শ্বৰিফুল ঈৰ্ষাত জ্বলি-পুৰি মৰিবলৈ ধৰে৷ ৰেণুক চৰকাৰী চাকৰিত যোগদান নকৰিবলৈ শ্বৰিফুলে বাৰে বাৰে কোৱাৰ পিছতো ৰেণুৱে স্বামীৰ কথা শুনা নাছিল৷ৰেণুৱে  দুৰ্গাপুৰৰ ব্যক্তিগত চিকিৎসালয়ৰ নাৰ্ছৰ কামটোৰ পৰা পদত্যাগ কৰি অহাৰ নিশাই খঙত টিঙিৰিতুলা হৈ পৰা স্বামী শ্বৰিফুলে ৰেণুৰ হাত এখন কাটি পেলায়৷

 ৰেণুৰ চিঞৰ শুনি  চুবুৰীয়া লোকে ততাতৈয়াকৈ তেওঁলোকৰ ঘৰলৈ আহে আৰু ৰেণুক তেজৰ ডোঙাৰ মাজত পৰি থকা দেখা পায়৷ লগে লগে স্থানীয় লোকে ৰেণুক সংকটজনক অৱস্থাত  কাটৱা মহকুমা চিকিৎসালয়লৈ লৈ যায়৷  উন্নত  চিকিৎসাৰ বাবে তাৰ পৰা তেওঁক দুৰ্গাপুৰ মিছন চিকিৎসালয়লৈ লৈ যোৱা হৈছিল। তেওঁ এই মুহূৰ্তত ৰেণু  চিকিৎসালয়তে আছে আৰু তেওঁ এতিয়াও সংকটমুক্ত নহয় বুলি জানিব পৰা গৈছে৷

আৰক্ষীয়ে  ঘটনা সন্দৰ্ভত  শ্বৰিফুল, তেওঁৰ পিতৃ-মাতৃ আৰু দুজন বন্ধুৰ বিৰুদ্ধে এটা গোচৰ ৰুজু কৰি তদন্ত অব্যাহত ৰাখিছে৷।