ইজনৰ পাছত সিজন পৰিছে জালত: সিদ্ধুৰ হত্যাকাণ্ডৰ তৃতীয়গৰাকী অভিযুক্তক গ্ৰেপ্তাৰ কৰি তদন্ত আৰু জোৰদাৰ কৰিলে পঞ্জাব আৰক্ষীয়ে

ডিজিটেল ডেস্ক: পঞ্জাবৰ জনপ্ৰিয় কণ্ঠশিল্পী সিদ্ধু মুছেৱালাৰ হত্যাকাণ্ডৰ তদন্ত প্ৰক্ৰিয়া অব্যাহত ৰাখিছে পঞ্জাব আৰক্ষীয়ে৷ হাৰিয়ানাৰ পৰা দুগৰাকী অভিযুক্তক আটক কৰাৰ পাছত কালি তৃতীয়গৰাকী অভিযুক্তকো হাৰিয়ানাৰ ফটেহাবাদৰ পৰা গ্ৰেপ্তাৰ কৰে পঞ্জাব আৰক্ষীয়ে৷

সিদ্ধু মুছেৱালাৰ হত্যাৰ অভিযোগত গ্ৰেপ্তাৰ হোৱা এইগৰাকী অভিযুক্তক দেৱেন্দ্ৰ ওৰফে কালা বুলি জানিব পৰা গৈছে৷ পূৰ্বে গ্ৰেপ্তাৰ হোৱা আন দুজন অভিযুক্তৰ তথ্যৰ ভিত্তিত দেৱেন্দ্ৰ ওৰফে কালাক হাৰিয়ানাৰ ফতেহাবাদৰ পৰা যোৱা নিশা পঞ্জাৱ আৰক্ষীয়ে গ্ৰেপ্তাৰ কৰে৷

ইয়াৰ পূৰ্বে, আৰক্ষীয়ে ভীৰদানৰ পৰা পৱন আৰু নাচিব নামৰ দুজন লোকক গ্ৰেপ্তাৰ কৰিছিল, শেহতীয়াকৈ দেৱেন্দ্ৰ হৈছে ফতেহাবাদ জিলাৰ গ্ৰেপ্তাৰ হোৱা তৃতীয়গৰাকী অভিযুক্ত৷

গোচৰটোত প্ৰথম গ্ৰেপ্তাৰ হৈছিল উত্তৰাখণ্ডৰ মনপ্ৰীত৷ ২৯ মে’ত পঞ্জাৱৰ মানসা জিলাত অচিনাক্ত আক্ৰমণকাৰীয়ে মুছেৱালাক গুলীয়াই হত্যা কৰিছিল। কানাডাস্থিত গেংষ্টাৰ গোল্ডি ব্ৰাৰে এটা ফেচবুক পোষ্টত এই হত্যাকাণ্ডৰ দায়িত্ব স্বীকাৰ কৰিছিল৷