ডিজিটেল ডেস্কঃ কিছু ঘণ্টাৰ পাছত ভাৰত আৰু অষ্ট্ৰেলিয়াৰ মাজত অনুষ্ঠিত হ’বলগীয়া বিশ্বকাপৰ চূড়ান্ত খেলখন আৰম্ভ হ’ব৷ এই দুয়োটা দলে সমগ্ৰ প্ৰতিযোগিতাখনত উজ্জ্বল প্ৰদৰ্শন আগবঢ়াইছে। বিশেষকৈ যদি আমি ভাৰতৰ কথা কওঁ, এই দলটোৱে সমগ্ৰ বিশ্বকাপৰ ছিজনত এখনো মেচত পৰাস্ত হোৱা নাই, তাৰ এটা ডাঙৰ কাৰণ হৈছে মহম্মদ ছামি। ফাইনেল মেচত মহম্মদ ছামিৰ পৰা টিম ইণ্ডিয়া আৰু ভাৰতৰ সকলো অনুৰাগীয়ে বহু আশা কৰিছে।
এই বিশ্বকাপৰ প্ৰাৰম্ভিক মেচসমূহত মহম্মদ ছামিয়ে খেলা নাছিল যদিও সুযোগ পোৱাৰ পাছৰে পৰা কোনেও তেওঁক দলৰ পৰা বাদ দিব পৰা নাই। ধৰ্মশালাত নিউজিলেণ্ডৰ বিৰুদ্ধে খেলখনত মহম্মদ ছামিয়ে খেলিছিল, আৰু প্ৰথমখন খেলতে ৫টা উইকেট দখল কৰিছিল। ইয়াৰ পাছতো ছামিয়ে ভাল প্ৰদৰ্শন আগবঢ়াই মাত্ৰ ৬খন মেচতে ২৩টা উইকেট দখল কৰি এই বিশ্বকাপত সৰ্বাধিক উইকেট দখলকাৰী হিচাপে পৰিগণিত হয়। ভাৰত আৰু নিউজিলেণ্ডৰ মাজত অনুষ্ঠিত ছেমি ফাইনেল মেচতো ছামিয়ে আচৰিত ধৰণৰ প্ৰদৰ্শন আগবঢ়ায়। সেই মেচতো ছামিয়ে নিউজিলেণ্ডৰ ৭ জন বেটছমেনক আউট কৰি টিম ইণ্ডিয়াক জয়ৰ দিশত আগুৱাই লৈ যায় আৰু নিজেই মেচখনৰ শ্ৰেষ্ঠ খেলুৱৈ হিচাপে পৰিগণিত হয়।
তেওঁৰ প্ৰশিক্ষক বদৰুদ্দিনে কয় যে ''লকডাউনৰ সময়ছোৱাত ছামিয়ে তেওঁৰ বলিং শক্তিশালী কৰিবলৈ বহুখিনি কষ্ট কৰিছিল। নিজৰ গাঁৱলৈ আহি ভায়েকৰ ওচৰত বলিং কৰিছিল। মহম্মদ ছামিয়ে দুপৰীয়া ২ বজাৰ পৰা নিশা ১০ বজালৈ ভাতৃৰ ওচৰত বলিং কৰিছিল, অৰ্থাৎ প্ৰতিদিনে একে ঠাইতে ৮ ঘণ্টা ধৰি বলিং অনুশীলন কৰিছিল ছামিয়ে। সেইবাবেই আমি ভাবিছিলো যে মহম্মদ ছামি এটা বলিং মেচিন, যিয়ে একে ঠাইতে অবিৰতভাৱে বল নিক্ষেপ কৰি থাকিব পাৰে।''
ছামিৰ প্ৰশিক্ষকে কয় যে ছামিয়ে একেখন খেলপথাৰতে বহু ঘণ্টা ধৰি অবিৰতভাৱে বলিং কৰিব পাৰে। ইয়াৰ উপৰিও মহম্মদ ছামিৰ প্ৰশিক্ষকে কয় যে, লকডাউনৰ সময়ত ছামিয়ে বলিঙৰ ক্ষেত্ৰত নিয়ৰৰ সমস্যা দূৰ কৰিবলৈও অনুশীলন কৰিছিল। খেলপথাৰত নিয়ৰৰ বাবে, বলাৰসকলে ৰাতি বল ধৰিবলৈ আৰু সঠিকভাৱে বলিং কৰাত অসুবিধাৰ সন্মুখীন হয়, কিন্তু ছামিয়ে ৰাতি ৰাতি ভিজা বলৰ সৈতেও বলিঙৰ বহুত অনুশীলন কৰিছে, যাতে প্ৰয়োজন হ’লে ইয়াক ব্যৱহাৰ কৰিব পৰা যায়।
Continue Reading
