ছেল্‌ফী তুলিবলৈ যাওঁতেই নদীত পিছলিল যুৱক, বৰ্তমানেও সন্ধানহীন

ডিজিটেল ডেস্ক: হৰিষদে বিষাদ! ছেল্‌ফীয়েই কাল হ’ল এজন যুৱকৰ৷ ফুৰিবলৈ যাওঁতে কোনে কেইখন ছেল্‌ফী পোষ্ট কৰিব ছ’চিয়েল মিডিয়াত, তাৰেই যেন এক অঘোষিত প্ৰতিযোগিতা৷ তাৰপাছতেই লাইক, শ্বেয়াৰ, কমেণ্টৰ বৰষুণ৷ পিছে এইবাৰ ছেল্‌ফীয়ে বিপদ মাতিলে এগৰাকী পৰ্যটকৰ জীৱনলৈ৷ ছেল্‌ফী তুলিবলৈ যাওঁতেই পিছলি পৰিল এজন পৰ্যটক৷

জাৰকাল ভ্ৰমণৰ বাবে আটাইতকৈ উৎকৃষ্ট সময়৷ ইয়াৰ বাবে বিভিন্নজনে ঢাপলি মেলে মনোমোহা প্ৰাকৃতিক সৌন্দৰ্যৰে ভৰপূৰ ভাৰত-চীন সীমান্তৰ লাচুং আৰু য়ুমথাং উপত্যকাত৷ প্ৰকৃতিৰ ৰূপ-লাৱণ্যই বিমুগ্ধ কৰে শত-সহস্ৰ যাত্ৰীক৷ লাখ লাখ পৰ্যটক প্ৰতিবছৰে ঢাপলি মেলে এই পৰ্যটনস্থলীলৈ। মনোৰম দৃশ্যপট আৰু আপেলৰ বাগিচাৰো আছে সুকীয়া বৈশিষ্ট্য৷ পিছে এই দৃশ্যপট উপভোগ কৰিবলৈ যাওঁতেই বিপদত পৰিল এজন যুৱক৷

বিহাৰৰ পৰা অহা এজন পৰ্যটকে ছেল্‌ফী তুলিবলৈ গৈ ছিকিমৰ লাচুং নদীত পিছলি পৰে৷ পুৱা ৭.৩০ বজাত সংঘটিত হয় এই শোকাৱহ দুৰ্ঘটনাটো৷ ২১ বছৰীয়া বিহাৰৰ বাসিন্দা অভিষেক কুমাৰ সোমবাৰে ফুৰিবলৈ গৈছিল লাচুং চহৰত৷ লাচুং নদীৰ পাৰত ছেল্‌ফী লওঁতেই পিছলি পৰে ২১ বছৰীয়া যুৱকজন৷ বৰ্তমানেও সন্ধানহীন অভিষেক!