ছেলুলয়ডত বন্দী হ’ব ড° নগেন শইকীয়াৰ আশীৰ দশকতে লিখা মননশীল গল্প 'ষ্টাফ ফটোগ্ৰাফাৰৰ ছবি’

কৃষ্টিৰ পথাৰত সৃষ্টিৰ প্ৰতিশ্ৰুতি লৈ খোজ দিয়া ‘স্বাৱলম্বন মিডিয়া এণ্ড এন্টাৰটেইনমেন্ট’ৰ বেনাৰত নিৰ্মাণ হ’ব লগা ছবখনৰ নতুনকৈ নাম ৰখা হৈছে ‘WIDE-ANGLE’। আশীৰ দশকৰ অসমৰ ঐতিহাসিক বিদেশী বহিষ্কাৰ আন্দোলনৰ পটভূমিত নিৰ্মাণ হ'ব লগা ছবিখনত সৎ সাহসী আৰু সত্যনিষ্ঠ সাংবাদিকতাত বিশ্বাস ৰখা এগৰাকী ষ্টাফ ফটোগ্ৰাফাৰৰ জীৱনৰ নিৰ্মম বাস্তৱিকতাক আজিৰ প্ৰেক্ষাপটত তুলি ধৰাকৈ চিত্ৰনাট্য ৰচনা কৰিছে অসমৰ জনপ্ৰিয় নাট্যকাৰ, পৰিচালক পঙ্কজজ্যোতি ভূঞাই। 

ছবিখনৰ পৰিচালনাৰ গুৰুদায়িত্ব লৈছে অসমৰ জনপ্ৰিয় সংগীত শিল্পী তথা পৰিচালক জয়ন্ত নাথে। ছবিখনৰ সংগীত পৰিচালনাও পৰিচালকৰ নিজা। চিনেমাটোগ্ৰাফী কৰিব সুদক্ষ চিত্ৰগ্ৰহণকাৰী সুমন দুৱৰাই। ৰূপসজ্জা বিশ্ব শইকীয়াৰ। 

গণতান্ত্ৰিক ব্যৱস্থা এটাৰ চতুৰ্থ স্তম্ভ স্বৰূপ সংবাদ মাধ্যমত ফটো সাংবাদিক এজনৰ গুৰুত্ব অপৰিসীম। দিলীপ ভাগৱতী ইয়াত সমৰ্পিত ব্যক্তি যদিও নানা কাৰণত তেওঁ ব্যৰ্থ। সাংসাৰিক জীৱনটো তেওঁ বহু ঘাট-প্ৰতিঘাটৰ মুখামুখি হৈ আহিছে। নি:সন্তান দম্পতীৰহালৰ মনোবেদনা আৰু বাঢ়ি আহে যেতিয়া তেওঁলোকৰ প্ৰতিবেশী এটা পৰিয়ালৰ ল'ৰা, যি ছাত্ৰ নেতা, তেওঁক বিচাৰি প্ৰতি নিশাই আৰক্ষীয়ে অত্যাচাৰ কৰিবলৈ লয়। আশ্ৰয় বিচাৰি ল'ৰাজন ৰাতি ৰাতি ভাগৱতীৰ ঘৰত আশ্ৰয় লওঁতে গঢ়ি উঠে এক মানৱীয় সম্পৰ্ক। আৰু এই সম্পৰ্কৰ বাবে ভাগৱতী পৰিয়ালে কি ত্যাগ কৰিব লগা হ’ল তাৰেই ভেটিতে নিৰ্মাণ হ’ব এই ছবিখন। 

অসমৰ এগৰাকী প্ৰখ্যাত অভিনেতা তপন দাসে এটা মূল চৰিত্ৰত অভিনয় কৰাৰ লগতে আন গুৰুত্বপূৰ্ণ চৰিত্ৰত অভিনয় কৰিব অপৰ্ণা দত্ত চৌধুৰী, পৱিত্ৰ বৰুৱা, জ্বলি লস্কৰ, নৱাগত দীপাঙ্কৰ ৰয় আৰু নৱাগত ধ্যানী মহনে। আন্দোলনৰ সুৰবাহিনীৰ এগৰাকী নেতা তথা গায়কৰ ৰূপত দেখা পাব অসমীয়াৰ হিয়াৰ আমঠু জুবিন গাৰ্গক। অতিথি শিল্পী হিচাপে ভূমুকি মাৰিব ৰাজীৱ গোস্বামী আৰু গীতাৱলী ৰাজকুমাৰীয়ে। ছবিখনৰ সম্পাদনা কৰিব দেৱজিৎ দত্তই। মখ্য সহকাৰী পৰিচালক দীপক নাথ। স্থিৰ চিত্ৰগ্ৰহণ কৰিব পল্লৱ মহন্তই। কাষ্টিং ডাইৰেক্টৰ হিচাপে আছে ৰঞ্জন শৰ্মা, পাৰ্থপ্ৰতীম বৰঠাকুৰ আৰু ৰাজীৱ শইকীয়া। কলা নিৰ্দেশক মানস বৰঠাকুৰ আৰু বিচিত্ৰ বৰাৰ। ছবিখনৰ প্ৰযোজনা নিয়ন্ত্ৰক মিন্টু বৰা। ডিজিটেল মাধ্যমৰ প্ৰচাৰত আছে জিলি। ২৭ মে’ৰ পৰা যোৰহাটত চিত্ৰগ্ৰহণ আৰম্ভ হ'ব বুলি প্ৰযোজক পক্ষই জানিবলৈ দিয়ে।