ডিজিটেল ডেস্ক: বলীউডৰ অভিনেতা ছলমান খানে আকৌ এবাৰ ভাবুকি লাভ কৰিছে। এইবাৰ মুম্বাই ট্ৰেফিক আৰক্ষীৰ জৰিয়তে এই ভাবুকিপূৰ্ণ বাৰ্তা লাভ কৰিছে। বাৰ্তা প্ৰেৰণ কৰা ব্যক্তিজনে নিজকে লৰেন্স বিষ্ণয় গেঙৰ ঘনিষ্ঠ বুলি অভিহিত কৰিছে।
উল্লেখ্য যে, মুম্বাই ট্ৰেফিক আৰক্ষীৰ হোৱাটছএপ নম্বৰত লৰেন্স বিষ্ণয়ৰ সৈতে দীৰ্ঘদিনীয়া শত্ৰুতা শেষ কৰিবলৈ অভিনেতা ছলমান খানৰ পৰা ৫ কোটি টকাৰ দাবী জনাই ভাবুকিপূৰ্ণ বাৰ্তা আহিছে। এই বাৰ্তা প্ৰেৰণ কৰা ব্যক্তিজনে দাবী কৰিছে যে তেওঁ ছলমান আৰু লৰেন্স গেঙৰ মাজত মিলন আনিব, যাৰ বাবে তেওঁ ধন বিচাৰিছে আৰু সকীয়াই দিছে যে যদি ধন নিদিয়ে তেন্তে ছলমান খানৰ অৱস্থা বাবা ছিদ্দিকীতকৈও ভয়াবহ হ’ব।
ট্ৰেফিক আৰক্ষীৰ হোৱাটছএপ নম্বৰত অহা বাৰ্তাত প্ৰেৰকে দাবী কৰে যে, "এইটো সহজভাৱে নল'ব , যদি ছলমান খানে জীয়াই থাকিব বিচাৰে আৰু লৰেন্স বিষ্ণয়ৰ সৈতে শত্ৰুতা শেষ কৰিব বিচাৰে, তেন্তে তেওঁ ৫ কোটি টকা দিব লাগিব। যদি... টকা নিদিয়ে ছলমান খানৰ অৱস্থা বাবা ছিদ্দিকীতকৈও ভয়াবহ হ'ব।" মুম্বাই আৰক্ষীয়ে এই বিষয়টো অতি গুৰুত্বসহকাৰে লৈ বিষয়টোৰ তদন্ত আৰম্ভ কৰিছে।
শেহতীয়াকৈ দশেৰাৰ দিনা তেওঁৰ ঘনিষ্ঠ বন্ধু তথা এনচিপিৰ প্ৰবীণ নেতা বাবা ছিদ্দিকীক ৰাজহুৱাভাৱে গুলীয়াই হত্যা কৰা হৈছিল তাৰ পাছতেই ছলমান খানে এই ভাবুকি লাভ কৰিছে। এই হত্যাকাণ্ডৰ দায়িত্ব ল’লে লৰেন্স বিষ্ণয় গেঙে। এতিয়া ছলমান খানৰ এই ভাবুকিৰ পিছত আৰক্ষী বিভাগত চাঞ্চল্যৰ সৃষ্টি হৈছে।
উল্লেখ্য যে শেহতীয়াকৈ ছলমান খানৰ নিৰাপত্তা বৃদ্ধি কৰা হৈছে। এতিয়া তেওঁক Y+ নিৰাপত্তা প্ৰদান কৰা হৈছে। ইয়াৰ পিছতেই তেওঁৰ নিৰাপত্তাৰ বাবে প্ৰায় ২৫ জন নিৰাপত্তাৰক্ষী নিয়োগ কৰা হ’ব। এই ব্যৱস্থাত প্ৰায় ২ৰ পৰা ৪ জন এনএছজি কমাণ্ডো আৰু আৰক্ষীৰ নিৰাপত্তাৰক্ষীও উপস্থিত থাকিব। ইয়াৰ উপৰিও দুইৰ পৰা তিনিখন বুলেট প্ৰুফ বাহনো তেওঁৰ সৈতে থাকিব।
Continue Reading
