ডিজিটেল ডেস্কঃ মোদী আহিব। এই কথাষাৰ শুনাৰ লগে লগেই যেন দেশৰ বহু ৰাজ্যৰ মুখ্যমন্ত্ৰীকে ধৰি আন মন্ত্ৰীগণৰ তৎ নোহোৱা হৈ পৰে। মোদীৰ কিবা সমাৱেশ থাকিলেতো কথাই নাই, দুদিন মান আগৰে পৰা বাছ, সৰু বাহন আদি অধিগ্ৰহণ কৰাৰো ধুম উঠে। বিশেষকৈ বিজেপি শাসিত ৰাজ্যসমূহত এয়া এক সাধাৰণ ঘটনা। কিন্তু এনে ঘটনাৰ ব্যতিক্ৰম ঘটি আহিছে তেলেংগানাত।
তেলেংগানাৰ মুখ্যমন্ত্ৰী কে চন্দ্ৰশেখৰ ৰাৱৰ বাবে মোদী তেওঁৰ ৰাজ্যলৈ আহিলেও তত হেৰুৱাবলগীয়া একো নাই। সেয়ে বিগত ছমাহত মোদীয়ে যি তিনিবাৰ তেলেংগানালৈ গৈছে কোনোবাৰেই ৰাৱে মোদীক বিমান বন্দৰত আদৰণি জনোৱা নাই।
এইবাৰো মোদী হাদৰাবাদলৈ গৈছে, হায়দৰাবাদত চলি আছে বিজেপিৰ ৰাষ্ট্ৰীয় কাৰ্যনিৰ্বাহক। কিন্তু তেলেংগানাৰ মুখ্যমন্ত্ৰী কে চন্দ্ৰশেখৰ ৰাৱে এইবাৰো হায়দৰাবাদৰ বেগমপেট বিমানবন্দৰত উপস্থিত হোৱাৰ পিছত প্ৰধানমন্ত্ৰী নৰেন্দ্ৰ মোডীক আদৰণি নজনালে।
বিষয়টোকলৈ যথেষ্ট হুলস্থূল হোৱাৰ পিছতে তেলেংগানাৰ মন্ত্ৰী টি শ্ৰীনিবাস যাদৱে কয় যে প্ৰটোকলৰ হিচাবে প্ৰধানমন্ত্ৰীক আদৰণি জনোৱাৰ বাবে কেৱল এজন ৰাজ্যিক প্ৰতিনিধিৰ প্ৰয়োজন। যাদৱে কয় "মুখ্যমন্ত্ৰীয়ে মোদীক কিয় আদৰণি জনাব লাগে? প্ৰটোকল অনুসৰি, ৰাজ্যৰ প্ৰতিনিধি এজনে গৈ আদৰণি জনালেই হ’ল। সেয়েহে, মই তেওঁক মন্ত্ৰী হিচাপে আদৰণি জনাবলৈ বিমানবন্দৰলৈ গৈছো" ।
উল্লেখ্য তেলেংগানাৰ মুখ্যমন্ত্ৰী কে চন্দ্ৰশেখৰ ৰাৱে মে’ মাহত প্ৰধানমন্ত্ৰী মোদীয়ে তেলেংগানা ভ্ৰমণ কৰাৰ সময়ত বাংগালুৰুলৈ উৰা মাৰিছিল।চলিত বৰ্ষৰ ফেব্ৰুৱাৰী মাহত প্ৰধানমন্ত্ৰীৰ হায়দৰাবাদ ভ্ৰমণৰ সময়ত মুখ্যমন্ত্ৰী ৰাও ৰাজ্য খনত অনুপস্থিত আছিল৷ ইফালে, প্ৰধানমন্ত্ৰী মোদীয়ে বিমান বন্দৰত অৱতৰণৰ মাত্ৰ কেইঘণ্টামান আগতে কেচিআৰে শনিবাৰে একেটা বিমানবন্দৰতে বিৰোধী দলৰ ৰাষ্ট্ৰপতি পদৰ প্ৰাৰ্থী যশৱন্ত সিনহাক আদৰণি জনাইছিল৷
তেলেংগানা ৰাষ্ট্ৰ সমিতিয়ে (টিআৰএছ) সিনহাৰ বাবে আনকি এটা মেগা ৰোড শ্ব' অনুষ্ঠিত কৰাৰ পৰিকল্পনা কৰিছে।
হায়দৰাবাদত ভাৰতীয় জনতা পাৰ্টীৰ দুদিনীয়া ৰাষ্ট্ৰীয় কাৰ্যনিৰ্বাহক বৈঠকৰ সময়ত বিজেপিৰ বহু নেতাৰে ভৰি পৰিছে হায়দৰাবাদ। কিন্তু তেলেংগানা চৰকাৰৰ পৰা যেন তেওঁলোকে বচৰা ধৰণে পোৱা নাই সঁহাৰি।
বিজেপিৰ উপ-সভাপতি বসুন্ধৰা ৰাজেই কয় যে ৰাষ্ট্ৰীয় কাৰ্যনিৰ্বাহক সভাত সকলো গুৰুত্বপূৰ্ণ বিষয় আৰু বৰ্তমানৰ ৰাজনৈতিক পৰিৱেশৰ বিষয়ে আলোচনা কৰা হৈছে।
Continue Reading
