চৰকাৰৰ বিৰুদ্ধে অভিযোগ আনি কাৰাবন্দী ১২৭ সাংবাদিক! তৈয়াৰ সৰ্ববৃহৎ কাৰাগাৰো

ডিজিটেল ডেস্ক: চৰকাৰৰ বিৰুদ্ধে অভিযোগ তুলি কাৰাগাৰত সোমাল শতাধিক সাংবাদিক৷ কেৱল সাংবাদিকক কাৰাৰুদ্ধ কৰিবৰ বাবে তৈয়াৰ কৰিছে কাৰাগাৰো৷ চৰকাৰৰ বিৰুদ্ধে অনা অভিযোগৰ ভিত্তিতে গণতন্ত্ৰৰ চতুৰ্থ স্তম্ভক ৰুদ্ধ কৰিবৰ বাবে এই প্ৰচেষ্টা চীন চৰকাৰৰ৷ চীন দেশৰ চৰকাৰে পেছাদাৰী আৰু অপেছাদাৰী ১২৭ গৰাকী সাংবাদিকক বন্দী কৰি ৰাখিছে কাৰাগাৰত৷ জানিব পৰা মতে দেশখনৰ চৰকাৰে বিশ্বৰ ভিতৰত সৰ্ববৃহৎ কাৰাগাৰ কেৱল সাংবাদিকক বন্দী ৰাখিবৰ বাবেই তৈয়াৰ কৰিছে৷

সাংবাদিকৰ প্ৰতিবাদী কণ্ঠ ৰোধ কৰিবৰ বাবে চৰকাৰখনে চলোৱা এই চেষ্টাক বহুতে গৰিহনা প্ৰকাশ কৰিছে৷ দেশখনৰ জি জিনপিং চৰকাৰৰ বিৰুদ্ধে উত্থাপিত কৰা অভিযোগৰ পাছতে সাংবাদিকক কাৰাগাৰত বন্দী কৰি ৰাখে৷ দীৰ্ঘদিন ধৰি বন্দী হৈ থকা সাংবাদিকসকলক মুকলি কৰাৰ কোনো ব্যৱস্থাও লোৱা নাই বৰ্তমানলৈকে৷ এই সাংবাদিকসকলৰ সৰহসংখ্যকে ইণ্টাৰনেট আৰু ব্লগৰ জৰিয়তে চীনৰ লগতে কমিউনিষ্ট চৰকাৰ বিৰুদ্ধে বহু বাতৰি প্ৰচাৰ কৰিছিল৷

চৰকাৰ বিৰোধী স্থিতি গ্ৰহণ কৰাৰ হেতুকে শাসকীয় চৰকাৰখনে কাৰাবন্দী কৰে ১২৭জনকৈ সাংবাদিকক৷ জিনপিঙৰ শাসন তথা চৰকাৰৰ বহু নীতি-বিৰোধী গুৰুত্বপূৰ্ণ তথ্য প্ৰচাৰ কৰাৰ অপৰাধতে কাৰাবন্দিত্বৰ জীৱন কটোৱা সাংবাদিকৰ ভিতৰত ৭১জন উইঘূৰ সম্প্ৰদায়ৰ সাংবাদিকো আছে৷ চীনৰ সংখ্যালঘু এই উইঘূৰ সম্প্ৰদায়ৰ সাংবাদিকসকলে জিনপিং চৰকাৰে চলোৱা নানা নিৰ্যাতন অত্যাচাৰৰ বিৰুদ্ধে ধাৰাবাহিকভাৱে প্ৰচাৰ কৰি আহিছিল৷

ইয়াৰ উপৰি মহামাৰী কৰ’নাৰ সংক্ৰমণৰ তথ্য প্ৰকাশ কৰাৰ অভিযোগতো গ্ৰেপ্তাৰ হৈছিল সাংবাদিক৷ ভাইৰাছৰ সংক্ৰমণৰ প্ৰকৃত তথ্য ফাদিল হোৱাৰ পাছতো মহিলা সাংবাদিকসহ কেইবাজনো কাৰাবন্দী কৰি ৰাখিছে দেশখনৰ চৰকাৰ প্ৰশাসনে৷