চকলেটৰ লোভ দেখুৱাই ৫বছৰীয়াক বলাৎকাৰ, হত্যা; শাস্তি বিহা ন্যায়াধীশকো ৰেহাই নিদিলে অপৰাধীয়ে

ডিজিটেল ডেস্ক : এটি শিশুক চকলেটৰ লোভ দেখুৱাই মাতি নিছিল লম্পট লোকজনে। তাৰ পাছত বলাৎকাৰ কৰে আৰু নিৰ্দয়ভাৱে হত্যা কৰিছিল। এই নিৰ্দয় অপৰাধীজনৰ শাস্তি কি হোৱা উচিত সেই প্ৰশ্নও যেন অবান্তৰ। এনে জঘন্য অপৰাধ সংঘটিত কৰাৰ পাছতো পিছে অপৰাধীৰ মনত নাই কোনো গ্লানি বা অপৰাধবোধ। ২৭ বছৰীয়া এই অপৰাধীজনে তেওঁক শাস্তিৰ ৰায় শুনোৱা ন্যায়াধীশগৰাকীকো আক্ৰমণ কৰিবলৈ কুণ্ঠাবোধ নকৰিলে এই জঘন্য অপৰাধীজনে। এই ঘটনা সংঘটিত হৈছে গুজৰাটৰ ছুৰাটত।

বৃহস্পতিবাৰে ধৰ্ষণ-হত্যাৰ গোচৰত দোষী সাব্যস্ত হোৱা ২৭ বছৰীয়া সুজিত ছাকেট নামৰ লোকজনক যাৱজ্জীৱন কাৰাদণ্ডৰ ৰায় বিহিছিল ছুৰাটৰ এখন আদালতে। এই ৰায় শুনাৰ পাছতে উত্তেজিত হৈ পৰা লোকজনে ন্যায়াধীশলৈ চেণ্ডেল দলিয়াই আক্ৰমণ কৰে। বিগত এপ্ৰিল মাহত লোকজনে এটি ৫বছৰীয়া শিশুক ধৰ্ষণ কৰি হত্যা কৰিছিল। শিশুটি আছিল এজন প্ৰব্ৰজিত শ্ৰমিকৰ কন্যা। আদালতে ভুক্তভোগী পৰিয়ালটোক ২০লাখ টকাৰ ক্ষতিপূৰণ দিয়াৰো নিৰ্দেশ দিয়ে। তাৰ পাছতে উত্তেজিত হৈ হিতাহিত জ্ঞান হেৰুৱাই পেলায় লোকজনে। আৰু চেণ্ডেল খুলি ন্যায়াধীশলৈ নিক্ষেপ কৰে।

উল্লেখ্য যে, আৰক্ষীয়ে লোকজনক গ্ৰেপ্তাৰ কৰি প’কছ’ আইনৰ অধীনত গোচৰ ৰুজু কৰিছিল। লোকজনে ন্যায়াধীশক আক্ৰমণ কৰা এই ঘটনাৰ সময়ত আদালতত উপস্থিত থকা এগৰাকী অধিবক্তা বিনয় শৰ্মাই এই ঘটনাৰ বিষয়ে বিৱৰি কয় যে, ন্যায়াধীশে ৰায় শুনোৱাৰ পাছতে লোকজন উত্তেজিত হৈ পৰে আৰু তেওঁলৈ চেণ্ডেল খুলি নিক্ষেপ কৰে। লোকজনে দাবী কৰা মতে তেওঁক মিছাকৈ এই গোচৰৰ সৈতে সাঙোৰা হৈছে। আদালতে ২৯গৰাকী সাক্ষীৰ সাক্ষ্যৰ আধাৰত এই ৰায় দিছিল।