ডিজিটেল ডেস্কঃ ২৩ আগষ্টত ভাৰতৰ চন্দ্ৰযান-৩ অভিযানে চন্দ্ৰৰ দক্ষিণ মেৰুত অৱতৰণ কৰি মহাকাশত ইতিহাসৰ সৃষ্টি কৰিছিল। ইয়াৰ পাছত সমগ্ৰ দেশতে আনন্দৰ পৰিৱেশ। শনিবাৰে (২৬ আগষ্ট) প্ৰধানমন্ত্ৰী মোদীয়ে ঘোষণা কৰিছিল যে চন্দ্ৰযান-৩ৰ অৱতৰণ স্থানক ‘শিৱশক্তি’ পইণ্ট বুলি কোৱা হ’ব। এই নাম সলনি কৰাৰ পাছত দেশৰ ৰাজনীতিত তীব্ৰ প্ৰতিক্ৰিয়াৰ সৃষ্টি হৈছে।
এতিয়া হিন্দু মহাসভাৰ সভাপতি স্বামী চক্ৰপাণিয়েও এই বিষয়ত বিবৃতি দিছে। সংবাদ সংস্থা এএনআইৰ মতে, দেওবাৰে (২৭ আগষ্ট) তেওঁ কয় যে- জেহাদী মানসিকতাৰ লোকসকল চন্দ্ৰত উপনীত হোৱাৰ আগতেই চন্দ্ৰক হিন্দু ৰাষ্ট্ৰ হিচাপে ঘোষণা কৰিব লাগে।তেওঁ আৰু কয়, "আমি শিৱশক্তি পইণ্টক শিৱশক্তি ধাম হিচাপে চাইছো। হিন্দু মহাসভা, সন্ত মহাসভাৰ হৈ চন্দ্ৰক হিন্দু ৰাষ্ট্ৰ হিচাপে ঘোষণা কৰি শিৱশক্তি পইণ্টক ৰাজধানী হিচাপে গঢ়ি তুলিবলৈও চৰকাৰলৈ এখন পত্ৰ প্ৰেৰণ কৰিছো।" লগতে উক্ত সভাখনত এটা প্ৰস্তাৱ গৃহীত কৰা হৈছিল যে "আমি শিৱশক্তি পইণ্টত ভগৱান শিৱ, মা পাৰ্বতী আৰু ভগৱান গণেশৰ এটা ভব্য মন্দিৰ নিৰ্মাণ কৰিম।"
শনিবাৰে প্ৰধানমন্ত্ৰী মোদীয়ে এই কথাও কৈছিল যে ২০১৯ চনত চন্দ্ৰযান-২ চন্দ্ৰপৃষ্ঠত যি স্থানত চিন ৰাখিছিল, সেই ঠাইৰ নাম ত্ৰিৰংগা পইণ্ট আৰু ২৩ আগষ্টক ৰাষ্ট্ৰীয় মহাকাশ দিৱস হিচাপে পালন কৰা হ’ব।
Continue Reading
