দায়িত্বৰ প্ৰতি সচেতন আছিল প্ৰাক্তন বৈদেশিক মন্ত্ৰী সুষমা স্বৰাজ, মৃত্যুৰ আগমুহূৰ্ততো ১ টকা পৰিশোধ কৰিবলৈ পাহৰা নাছিল তেওঁ

বিজেপিৰ জনপ্ৰিয় নেত্ৰীগৰাকী নৰেন্দ্ৰ মোদী নেতৃত্বাধীন প্ৰথমখন কেন্দ্ৰীয় চৰকাৰৰ বিদেশ মন্ত্ৰী আছিল।তেওঁৰ কাৰ্য্যকালত হেগস্থিত ইণ্টাৰনেচনেল ক’ৰ্ট অৱ জাষ্টিচত কূলভূষণ যাদৱ গোচৰটো চলি আছিল৷ সেই গোচৰত মাত্ৰ  ১ টকা পাৰিশ্ৰমিক লৈ ভাৰতৰ হৈ যুঁজিছিল জ্যেষ্ঠ অধিবক্তা হৰিশ চালভেই।

গোচৰটোৰ বাবে  চালভেক  ১ টকাৰ পাৰিশ্ৰমিক পৰিশোধ কৰিবলগীয়া কথাটো সুষমা স্বৰাজে তেওঁৰ মৃত্যুৰ আগে আগে মনত পেলাইছিল আৰু সেই টকাটো আদায় দিয়াৰ কথা কৈছিল৷সেই ১ টকাটো ল’বলৈ মৃত্যুৰ প্ৰায় এঘণ্টা পূৰ্বে অধিবক্তা চালভেক  মনত পেলাই  দিছিল সুষমাই।সুষমাৰ মৃত্যুৰ পিছতে এই কথা সংবাদ মাধ্যমৰ আগত  সদৰী কৰিছিল অধিবক্তা চালভেই। সুষমাই ভাৰতৰ উচ্চতম ন্যায়ালয়ত ওকালতিৰেই নিজৰ পেছাদাৰী জীৱন আৰম্ভ কৰিছিল। সেয়ে তেওঁ অধিবক্তা এজনৰ শ্ৰমৰ মূল্য বুজি পাইছিল৷সুষমা স্বৰাজৰ শেষ ইচ্ছা তেওঁৰ কন্যা বাঞ্চুৰীয়ে পূৰণ কৰিছিল। বাঞ্চুৰীয়ে তেওঁৰ মাতৃৰ প্ৰতিশ্ৰুতি ৰক্ষা কৰি অধিবক্তা হৰিশ ছালভেক এক টকা আদায় দিছিল৷ হৰিশ ছালভেই এটকাৰ বিনিময়ত পাকিস্তানত বন্দী হৈ থকা কূলভূষণ যাদৱৰ গোচৰটো আন্ত:ৰাষ্ট্ৰীয় আদালতত চলাই গৈছিল৷

২০১৯ চনৰ  ৬ আগষ্টৰ নিশা প্ৰায় ৮.৫০ বজাত দেশৰ প্ৰসিদ্ধ অধিবক্তা হৰিশ ছালভেক সুষমাই  ফোন কৰি কৈছিল যে পিছদিনাই  তেওঁ আন্ত:ৰাষ্ট্ৰীয় আদালতত কূলভূষণ যাদৱৰ গোচৰটো চলোৱাৰ বাবে পাবলগীয়া  পাৰিশ্ৰমিক যাতে গ্ৰহণ কৰিবলৈ আহে। 

কিন্তু সেই নিশাই হৃৎযন্ত্ৰৰ ক্ৰিয়া বন্ধ হৈ সুষমা স্বৰাজৰ মৃত্যু হৈছিল ।তেওঁ চালভেক নিজ হাতে দিব পৰা নাছিল সেই এটকাটো৷

২০১৯ চনৰ ৬ আগষ্টৰ নিশা  ১০ বাজি ১৫ মিনিটত অসুস্থ হৈ পৰা  সুষমা  স্বৰাজক হাস্পাতললৈ লৈ যোৱা হৈছিল ৷ কিন্তু বহু চেষ্টাৰ পিছতো তেওঁক বচাব পৰা নগ’ল৷ মৃত্যুৰ সময়ত তেওঁৰ বয়স হৈছিল ৬৭ বছৰ৷