দিল্লী বিস্ফোৰণৰ প্ৰতিশোধ! ডাক্তৰ ওমৰৰ কাশ্মীৰৰ ঘৰ বোমাৰে উৰুৱালে প্রশাসনে

ডিজিটেল ডেস্ক : সোমবাৰে লালকিল্লাৰ সমীপত সংঘটিত কাৰ-বোমা বিস্ফোৰণৰ গাড়ীখন চলাই যোৱা ডাঃ ওমৰ উন-নবীৰ জম্মু-কাশ্মীৰৰ পুলৱামা জিলাৰ কোলা নগৰত থকা পৰিয়ালৰ ঘৰটো বিস্ফোৰক ব্যৱহাৰ কৰি ধ্বংস কৰা হয়।

নবীৰ পিতৃ-মাতৃ, ভাতৃ আৰু ভাতৃবধুকে ধৰি পৰিয়ালৰ বেছিভাগ লোক উক্ত দুমহলীয়া ঘৰটোত বাস কৰিছিল।

পুলৱামাৰ চৰকাৰী বিষয়াই শুকুৰবাৰে পুৱা জনায় যে বৃহস্পতিবাৰে নিশা ঘৰটোৰ বাসিন্দাক বাহিৰলৈ উলিয়াই দি ঘৰটো বিস্ফোৰণ ঘটাই ধ্বংস কৰা হয়। স্থানীয় লোকে অভিযোগ কৰে যে উক্ত বিস্ফোৰণৰ বাবে কাষৰীয়া কেইবাটাও ঘৰ ক্ষতিগ্রস্ত হয়। অৱশ্যে জম্মু-কাশ্মীৰ আৰক্ষীয়ে এই সন্দৰ্ভত কোনো বিবৃতি জাৰি কৰা নাই।

ইয়াৰ পূৰ্বে উগ্রপন্থা সম্পর্কীয় গোচৰত অভিযুক্তৰ ঘৰ বে-আইনী কার্যকলাপ (প্রতিৰোধ) আইনৰ (ইউ এ পি এ) উপবন্ধৰ (প্রভিজিয়ন) অধীনত বাজেয়াপ্ত কৰা হৈছিল। শুকুৰবাৰৰ আগতে কাশ্মীৰত অভিযুক্তৰ ঘৰ ধ্বংস কৰা হৈছিল এপ্ৰিলৰ পহলগাম সন্ত্রাসবাদী আক্ৰমণৰ ঘটনাৰ পাছত।

নবীয়ে হাৰিয়ানাৰ ফৰিদাবাদৰ আল ফালাহ বিশ্ববিদ্যালয়ৰ স্কুল অব্ মেডিকেল ছায়েন্সেজ এণ্ড ৰিছাৰ্চ চেণ্টাৰত চাকৰি কৰিছিল। বিস্ফোৰণৰ দুদিনমান আগতে উক্ত বিশ্ববিদ্যালয়ৰ দুগৰাকী চিকিৎসক ডাঃ মুজাম্মিল আহমদ গানাই আৰু ডাঃ শ্বাহীন শ্বাহিদক আৰক্ষীয়ে গ্ৰেপ্তাৰ কৰিছিল।

উৎস: দৈনিক জনমভূমি