ডেমোত পথ দুৰ্ঘটনা: ৰাষ্ট্ৰীয় ঘাইপথত তিনিজন গুৰুতৰভাৱে আহত

শুক্ৰবাৰে নিশা ডেমোৰ দেহাজান অঞ্চলত ৰাষ্ট্ৰীয় ঘাইপথ ৩৭ ত এক ভয়ংকৰ পথ দুৰ্ঘটনা সংঘটিত হয়, য'ত তিনিজন লোক গুৰুতৰভাৱে আহত হয়। জানিব পৰা মতে, দুৰ্ঘটনাটোত এখন তীব্ৰবেগী ই-ৰিক্সাই পথৰ কাষত পাৰ্ক কৰি থোৱা এখন ট্ৰাকৰ পিছফালৰ পৰা খুন্দা মাৰে।

প্ৰাপ্ত তথ্য অনুসৰি, ডিব্ৰুগড়ৰ ফালৰ পৰা অহা ই-ৰিক্সাখন নিয়ন্ত্ৰণ হেৰুৱাই ট্ৰাকখনত খুন্দা মৰাৰ ফলত ইয়াৰ যাত্ৰীসকল বেয়াকৈ আঘাতপ্ৰাপ্ত হয়। দুৰ্ঘটনাত গুৰুতৰভাৱে আহত হোৱা লোকসকলক মইনা পাণ্ডৱ, চিটু পাণ্ডৱ আৰু বিশ্বজিৎ কৰ্মকাৰ বুলি চিনাক্ত কৰা হৈছে। আঘাত গুৰুতৰ হোৱাৰ বাবে আটাইকেইজনকে লগে লগে ডেমো মডেল চিকিৎসালয়লৈ প্ৰেৰণ কৰা হয় আৰু বৰ্তমান তেওঁলোক চিকিৎসাধীন হৈ আছে।

ঘটনাৰ পিছতে ট্ৰাকখনৰ চালক আৰু হেণ্ডিমেন ঘটনাস্থলীৰ পৰা পলায়ন কৰে বুলি সূত্ৰই প্ৰকাশ কৰিছে। এই ঘটনাৰ ফলত অঞ্চলটোত কিছু সময়ৰ বাবে যান-জঁটৰ সৃষ্টি হয়। আৰক্ষীয়ে ঘটনাস্থলীত উপস্থিত হৈ পৰিস্থিতি নিয়ন্ত্ৰণ কৰাৰ লগতে দুৰ্ঘটনা সন্দৰ্ভত তদন্ত আৰম্ভ কৰিছে। দুৰ্ঘটনাৰ সঠিক কাৰণ নিৰ্ণয়ৰ বাবে সবিশেষ অনুসন্ধান চলি আছে।