ডিজিটেল ডেস্কঃ ছবিৰ বাহিৰেও বলীউডৰ তাৰকা ছলমান খানে প্ৰায়ে নিজৰ ব্যক্তিগত জীৱনক লৈ শিৰোনাম দখল কৰে। এজনী ছোৱালীৰ কাষত থিয় হৈ এইবাৰ নজিৰ ৰচনা কৰিলে ভাইজান। হাড়ৰ মজ্জা দান কৰা প্ৰথম ভাৰতীয় হয় ছলমান। ছলমানে ২০১০ চনত ‘মজ্জা দাতা পঞ্জীয়ন ইণ্ডিয়া’ত পঞ্জীয়ন কৰিছিল। ডাক্তৰ সুনীল পাৰেখে সংবাদ মাধ্যমৰ আগত এই খবৰ নিশ্চিত কৰিছে।
চিকিৎসকগৰাকীয়ে সংবাদ মাধ্যমৰ আগত কয়, ‘মই আৰু এই হাড়ৰ মজ্জাৰ ৰোগত আক্ৰান্ত সকলো লোকে ছলমানক ইমান ডাঙৰ পদক্ষেপৰ বাবে ধন্যবাদ জনাইছো। পূজা নামৰ কণমানি এজনীক হাড়ৰ মজ্জা সংৰোপণৰ প্ৰয়োজন হৈছিল। ছলমানে সেই খবৰটো পঢ়িলে। তেওঁৰ ফুটবল দলৰ সকলোকে হাড়ৰ মজ্জা দান কৰিবলৈ কয়। কিন্তু দুৰ্ভাগ্যজনকভাৱে শেষ মুহূৰ্তত তেওঁলোক সকলোৱে পিছুৱাই গ’ল। তাৰ পিছত কেৱল ছলমান আৰু তেওঁৰ ভায়েক আৰবাজ খানে আগবাঢ়ি আহি হাড়ৰ মজ্জা দান কৰিলে।”
ছলমানে কৈছিল যে ভাৰতত হাড়ৰ মজ্জা দাতাৰ সংখ্যা অতি কম। সংবাদ মাধ্যমৰ আগত তেওঁ কয়, ‘আমাৰ দেশত হাড়ৰ মজ্জা দাতা মাত্ৰ পাঁচ হাজাৰহে আছে। কেৱল সজাগতাৰ অভাৱ নহয়। মানসিক সমস্যাও আছে। এই ৰোগত আক্ৰান্ত হোৱা সকলৰ দায়িত্বও আমাৰ। গতিকে হাড়ৰ মজ্জা দান কৰি জীৱন ৰক্ষা কৰক।”
আত্মবিশ্বাসেৰে ছলমানে ক’লে, “এয়া ঠিক তেজৰ পৰীক্ষাৰ দৰেই। বেছি সময় নালাগে। মই জানো, কিছুমান মানুহে ব্লাড টেষ্ট কৰিবলৈ ভয় কৰে। কিন্তু কিছু ইতিবাচক পৰিৱৰ্তন আনিবলৈ অলপ সাহসী হোৱাৰ সময় আহি পৰিছে।”
Continue Reading
