দেশ ৰক্তাক্ত কৰাৰ ষড়যন্ত্ৰ! ডাউড ইব্ৰাহিমে গঠন কৰিছে বিশেষ বাহিনী

ডিজিটেল ডেস্ক : পুনৰ ভয়ংকৰ কূটাঘাতৰ সন্মুখীন হ’ব পাৰে দেশ। দেশৰ প্ৰান্তে প্ৰান্তে পুনৰ হ’ব পাৰে ৰক্তক্ষয়। পুনৰ অন্তহীন আতংক আৰু উদ্বেগৰ মাজেৰে দিন কটাবলগীয়া হ’ব পাৰে দেশৰ জনগণ। এই আশংকা পুনৰ গাঢ় হৈ উঠিছে অপৰাধ জগতৰ এজন সম্ৰাটে পুনৰ মূৰ দাঙি উঠা বুলি লাভ কৰা খবৰৰ পাছতে। অপৰাধ জগতৰ এইজন কুখ্যাত প্ৰতিনিধি হৈছে ডাউড ইব্ৰাহিম। যাৰ নামটো শুনিলেই একধৰণৰ আতংকৰ সৃষ্টি হয়। কুখ্যাত ডি কোম্পানীৰ জৰিয়তে দেশক সন্ত্ৰাসিত কৰি তোলাৰ পৰা মুম্বাই বিস্ফোৰণলৈকে কিহত হাত নাই এই কুখ্যাত অপৰাধীজনৰ? কেৱল ভাৰতৰ বাবেই নহয়, সমগ্ৰ বিশ্বৰ বাবে আতংকৰ কাৰণ হৈ পৰা ডাউডে পুনৰ মূৰ দাঙি উঠিছে। পুনৰ আৰম্ভ কৰিছে ভাৰতবিৰোধী ষড়যন্ত্ৰ। ৰাষ্ট্ৰীয় অনুসন্ধানকাৰী সংস্থা চমুকৈ এনআইএ ডাউড ইব্ৰাহিম পুনৰ সক্ৰিয় হৈ উঠাৰ ইংগিত দিছে। মূলতঃ ভাৰতত কূটাঘাত সৃষ্টিৰ লক্ষ্যৰে সন্ত্ৰাসবাদীজনে আৰম্ভ কৰিছে ষড়যন্ত্ৰ। ভাৰতত সন্ত্ৰাসবাদী কাৰ্যকলাপ চলোৱাৰ বাবে ডাউডে বিশেষ গোট গঠন কৰা বুলি প্ৰকাশ কৰিছে এনআইএ। তদন্তকাৰী সংস্থাটোৰ মতে দেশৰ একাংশ শীৰ্ষস্থানীয় লোকক আক্ৰমণৰ লক্ষ্য কৰি ল’ব ডাউডৰ বিশেষ বাহিনীয়ে। ডাউডৰ হিট লিষ্টত শীৰ্ষ ৰাজনীতিক, উদ্যোগপতি, ব্যৱসায়ী আদিৰ নাম সন্নিৱিষ্ট হৈছে। সংস্থাটোৰ প্ৰাথমিক তদন্তত পোহৰলৈ অহা মাতে সমগ্ৰ দেশৰ বিভিন্ন প্ৰান্তত বিস্ফোৰণ আৰু বিধ্বংসী মাৰনাস্ত্ৰৰে আক্ৰমণ সংঘটিত কৰি অস্থিৰ পৰিস্থিতিৰ সৃষ্টি কৰাৰ ষড়যন্ত্ৰ ৰচনা কৰিছে ডাউডে। কেৱল এয়াই নহয় দিল্লী আৰু মুম্বাইক বিশেষভাৱে লক্ষ্য কৰি লৈছে সন্ত্ৰাসবাদীজনে। উল্লেখ্য যে, শেহতীয়াকৈ এনফ’ৰ্চমেণ্ট ডাইৰেক্টৰেটে ডাউড ইব্ৰাহিম আৰু তেওঁৰ একাধিক সহযোগীৰ বিৰুদ্ধে ধনৰ অবৈধ লেনদেনৰ গোচৰ ৰুজু কৰিছে। এই ধন কূটাঘাতমূলক কামৰ বাবে সৰবৰাহ কৰা হৈছে বুলি সন্দেহ কৰা হৈছে। আনহাতে ডাউডৰ কাৰাবন্দী ভাতৃ ইকবাল কাছকাৰকো জেৰা কৰিছে ইডি-এ। ২৪ ফেব্ৰুৱাৰীলৈ তেওঁক নিজৰ জিম্মাত লৈছে দেশৰ অৰ্থনৈতিক অপৰাধ সম্পৰ্কীয় বিষয়ৰ তদন্তকাৰী গোটটোৱে।