ডিজিটেল ডেস্কঃ দেশত বৰ্তমান স্বাধীনতা দিৱস উদযাপনৰ উখল মাখল পৰিৱেশে বিৰাজ কৰিছে। স্বাধীনতাৰ ৭৫ বছৰ উদযাপনৰ বাবে জনসাধাৰণৰ মাজত প্ৰচণ্ড উৎসাহ দেখা গৈছে। প্রধানমন্ত্রী নৰেন্দ্র মোদীয়ে 'হৰ ঘৰ ত্ৰিৰংগা' অভিযান ব্যাপক কৰি তুলিছে। দেশৰ প্ৰতি প্ৰেম আৰু শ্ৰদ্ধা নিবেদন কৰিবলৈ তামিলনাডুৰ কইম্বাটুৰৰ এজন লোকে চকুৰ ভিতৰত বনালে ত্ৰিৰংগা।
ছ'চিয়েল মিডিয়াত ভাইৰেল হৈ পৰিছে ব্যক্তিগৰাকীৰ ছবি। ৰাজা নামৰ এই ব্যক্তিজনে এজন শিল্পীৰ সহায় লৈ চকুৰ ভিতৰত ত্ৰিৰংগ বনাইছিল। শিল্পীগৰাকীয়ে এটা কণীৰ ভিতৰত থকা পাতল ছালত ত্ৰিৰংগা বনাই তাৰ পিছত সেই ব্যক্তিজনৰ চকুৰ ভিতৰত চাপ মাৰি দিছিল। এই কাম সম্পূৰ্ণ কৰিবলৈ কেইবা ঘণ্টা সময় লাগিল। ৰাজাই এই সকলোবোৰ ছ’চিয়েল মিডিয়াত শ্বেয়াৰ কৰে।
ৰাজাই নিজৰ চকুৰ ভিতৰত এনেদৰে ত্ৰিৰংগা বনাইছে যদিও অন্য লোকে যাতে এনে চেষ্টা নকৰে তাৰ বাবে তেওঁ এক সতৰ্কবাণীৰে সৈতে ছ’চিয়েল মিডিয়াত শ্বেয়াৰ কৰিছে ভিডিঅ’টো। ৰাজাই কৈছিল যে ''এনে কাম কৰিবলৈ চেষ্টা নকৰিব। ইয়াৰ ফলত চকুত এলাৰ্জী, খজুৱতি আৰু সংক্ৰমণ হ’ব পাৰে।''
ৰাজাই লগতে কয় যে ''মই চকুৰ ভিতৰত জাতীয় পতাকা বনাইছোঁ এটা বিশেষ কাৰণত। যাতে সাধাৰণ মানুহৰ মাজত সজাগতা বিয়পাই দিব পাৰো যে আমাৰ জাতীয় পতাকাখন কিমান গুৰুত্বপূৰ্ণ আমি সকলোৱে বুজি পোৱা উচিত। আমি সকলোৱে আমাৰ জাতীয় পতাকাখনৰ প্ৰতি সন্মান প্ৰদৰ্শন কৰা উচিত।''
Continue Reading
