দেশত নিবনুৱা সমস্যাৰ উদ্বেগজনক তথ্য: হাৰিয়ানাত সৰ্বাধিক

ডিজিটেল ডেস্ক: ক’ভিডোত্তৰ ভাৰতত ভয়াৱহৰূপত বৃদ্ধি পাবলৈ ধৰিছে নিবনুৱাৰ সংখ্যা৷ অতি উদ্বেগজনকভাৱে বৃদ্ধি পোৱা নিবনুৱাৰ নতুন পৰিসংখ্যাই দেশত ভৱিষ্যতে সামাজিক অস্থিৰতাৰো সংশয় নমাই আনিছে৷ এপ্ৰিলত ভাৰতত নিবনুৱাৰ হাৰ বৃদ্ধি পাইছে ৭.৮৩ শতাংশলৈ৷ আৰু শেহতীয়া এই পৰিসংখ্যাত শীৰ্ষত আছে হাৰিয়ানা৷

চেণ্টাৰ ফৰ মনিটৰিং ইণ্ডিয়ান ইক’ন’মি (চিএমআইই)ৰ দ্বাৰা প্ৰকাশিত তথ্য অনুসৰি, এপ্ৰিলত দেশত নিবনুৱাৰ হাৰ ৭.৮৩ শতাংশলৈ বৃদ্ধি পাইছে। মাৰ্চ মাহত এই হাৰ আছিল ৭.৬০ শতাংশ। হাৰিয়ানা আৰু ৰাজস্থানতে নথিভুক্ত হৈছে সৰ্বাধিক নিবনুৱা।

গ্ৰাম্য অঞ্চলত নিবনুৱাৰ সংখ্যা কম:

মন কৰিবলগীয়া যে মাৰ্চ মাহত দেশৰ নিবনুৱাৰ হাৰ আছিল ৭.৬০ শতাংশ। ভাৰতীয় অৰ্থনীতি নিৰীক্ষণ কেন্দ্ৰই প্ৰকাশ কৰা তথ্যত এইকথা প্ৰকাশ পাইছে। প্ৰতিবেদনত কোৱা হৈছে যে এপ্ৰিল মাহতো নিবনুৱা বৃদ্ধিৰ ক্ষেত্ৰত নগৰখণ্ড আগবাঢ়ি আছে। অৰ্থাৎ চহৰৰ তুলনাত গ্ৰাম্য অঞ্চলত নিবনুৱা হ্ৰাস পাইছে। তথ্য অনুসৰি, চহৰসমূহত নিবনুৱাৰ হাৰ মাৰ্চৰ ৮.২৮ শতাংশৰ পৰা ৯.২২ শতাংশলৈ বৃদ্ধি হৈছে। একেসময়তে, গ্ৰাম্য অঞ্চলত নিবনুৱাৰ হাৰ মাৰ্চৰ ৭.২৯ শতাংশৰ পৰা এপ্ৰিলত ৭.১৮ শতাংশলৈ হ্ৰাস পাইছে।

চি.এম.আই.ই.ৰ মতে, দেশৰ বিভিন্ন ৰাজ্যৰ তুলনাত হাৰিয়ানাত নিবনুৱাৰ হাৰ সৰ্বাধিক আছিল। আনহাতে ৰাজস্থান আছে দ্বিতীয় শীৰ্ষত৷ হাৰিয়ানাত এই পৰিসংখ্যা ৩৪.৫ শতাংশ আৰু ৰাজস্থানত ২৮.৮ শতাংশ নথিভুক্ত হৈছে৷ অৰ্থনীতিবিদসকলৰ মতে, ঘৰুৱা চাহিদা হ্ৰাস হোৱা আৰু বৰ্ধিত মূল্যৰ মাজত অৰ্থনৈতিক পুনৰুদ্ধাৰৰ লেহেম গতিয়ে নিযুক্তিৰ সুযোগ প্ৰভাৱিত কৰিছে। মাৰ্চত উপভোক্তা মুদ্ৰাস্ফীতি ১৭ মাহৰ সৰ্বোচ্চ ৬.৯৫ শতাংশত উপণীত হৈছিল।

উল্লেখযোগ্য যে, মুম্বাইস্থিত চি.এম.আই.ই.য়ে নিযুক্তিৰ তথ্যৰ লগতে শ্ৰমিকৰ অংশগ্ৰহণৰ ওপৰত তীক্ষ্ণ নজৰ ৰাখে আৰু ইয়াৰ পৰিসংখ্যা প্ৰকাশ কৰে। প্ৰতিবেদনত কোৱা হৈছে যে ২০২২ৰ মাৰ্চত দেশৰ শ্ৰমিকসকলৰ মাজত চাকৰি বিচাৰি পোৱাৰ হাৰ ৩৯.৫ শতাংশলৈ হ্ৰাস পাইছে, ২০১৯ৰ মাৰ্চৰ ৪৩.৭ শতাংশৰ বিপৰীতে। এই তথ্যই নিশ্চিত কৰে যে বহুসংখ্যক পেছাদাৰীয়ে চাকৰি বিচৰা বন্ধ কৰিছে।