ডিজিটেল ডেস্কঃ অৰ্থনৈতিক মন্দাৱস্থাৰ দিশে আগবাঢ়িছে নেকি চীন! চীনৰ সৰ্ববৃহৎ ছাঁয়া বেংক ঝংছি এণ্টাৰপ্ৰাইজ গ্ৰুপে বিনিয়োগকাৰীক সকীয়াই দিছে যে তেওঁলোকে ঋণ পৰিশোধ কৰিব নোৱাৰে। ঝংজিৰ এই বক্তব্যই বিনিয়োগকাৰীৰ ধনৰ বৃহৎ অংশ ৰিয়েল এষ্টেট প্ৰকল্পত বিনিয়োগ কৰা ট্ৰাষ্ট খণ্ডত বিপদঘণ্টা বজাইছে।
ইফালে চীন কৰ্তৃপক্ষই ঝংজি এণ্টাৰপ্ৰাইজ গ্ৰুপৰ তদন্ত আৰম্ভ কৰিছে। ঝংজিত ৩৬ বিলিয়ন মাৰ্কিন ডলাৰৰ অভাৱ উন্মোচন কৰি আৰক্ষীয়ে কেইবাজনো সন্দেহযুক্ত লোকক আটক কৰিছে। চাউথ চাইনা মৰ্নিং পোষ্টত প্ৰকাশিত বাতৰি অনুসৰি এই বৃহৎ বিত্তীয় কেলেংকাৰীয়ে চীনৰ বিত্তীয় ব্যৱস্থাৰ স্থিতিশীলতাৰ প্ৰতি গুৰুতৰ ভাবুকি কঢ়িয়াই আনিব পাৰে।বেইজিঙৰ আৰক্ষীয়ে এই গোচৰৰ কেইবাজনো সন্দেহযুক্ত লোকক আটক কৰিছে, য’ত জিই উপাধিৰ এজন ব্যক্তি আছে। এতিয়া আৰক্ষীয়ে তেওঁক জেৰা কৰি আছে। বিনিয়োগকাৰীসকলেও তেওঁলোকৰ তদন্ত আৰু প্ৰমাণ সংগ্ৰহৰ ক্ষেত্ৰত আৰক্ষীৰ সৈতে সক্ৰিয়ভাৱে সহযোগিতা আগবঢ়াব লাগে বুলি এক বিবৃতিত উল্লেখ কৰিছে।
উল্লেখ্য যে ২০২১ চনত ঝংজিৰ প্ৰতিষ্ঠাপক জি জিকুনৰ হাৰ্ট এটেকত মৃত্যু হৈছিল যদিও তেওঁৰ বহু আত্মীয়ই কোম্পানীটোৰ গুৰুত্বপূৰ্ণ কাৰ্যবাহী পদত কাম কৰি আছে। সন্দেহযুক্ত লোককেইজনৰ বিৰুদ্ধে গ্ৰহণ কৰা পদক্ষেপ সন্দৰ্ভত সবিশেষ তথ্য প্ৰদান কৰা নাই। এই সমস্যাৰ লক্ষণ প্ৰথমবাৰৰ বাবে আগষ্ট মাহত দেখা গৈছিল, যেতিয়া ঝংজিৰ সহযোগী কোম্পানী ঝংগ্ৰং ইণ্টাৰনেশ্যনেল ট্ৰাষ্টে লিকুইডিটিৰ সংকটৰ মাজত মেচিউৰিং পলিচিৰ ওপৰত ধন পৰিশোধ কৰাত বিলম্ব কৰিছিল। ৰিয়েল এষ্টেট সংকট গভীৰ হৈ অহাৰ মাজতে এই পৰিস্থিতিৰ সৃষ্টি হয়, কিয়নো এভাৰগ্ৰেণ্ড আৰু কান্ট্ৰী গাৰ্ডেন হোল্ডিংছৰ দৰে ডাঙৰ ডাঙৰ ডেভেলপাৰসকলে বৃদ্ধি পোৱা ঋণ আৰু সম্পত্তিৰ বিক্ৰী হ্ৰাস পোৱাৰ সৈতে যুঁজিছিল। কোম্পানীটোৰ বহুতো ট্ৰাষ্ট প্ৰডাক্টে দুৰ্দশাগ্ৰস্ত সম্পত্তি খণ্ডত যথেষ্ট বিনিয়োগ কৰিছিল। কোম্পানীটোৰ শেহতীয়া বাৰ্ষিক প্ৰতিবেদন অনুসৰি ঝংগ্ৰঙৰ ৮৬ বিলিয়ন মাৰ্কিন ডলাৰৰ পৰিচালিত সম্পত্তিৰ প্ৰায় ১১ শতাংশ ৰিয়েল এষ্টেটত বিনিয়োগ কৰা হৈছে, য’ত শ্বিমাও গ্ৰুপ আৰু ছাংক চাইনা হোল্ডিঙৰ দৰে অশান্ত ডেভেলপাৰৰ অংশীদাৰিত্ব আছে।
Continue Reading
