ধাৰাবাহিক বোমা বিস্ফোৰণে কঁপালে বিহাৰ! ৪ জন নিহত, আহত ১২

ডিজিটেল ডেস্ক : বিহাৰৰ ভাগলপুৰত বৃহস্পতিবাৰে নিশা সংঘটিত হয় এক ধাৰাবাহিক বোমা বিস্ফোৰণ৷ এই বিস্ফোৰণত ৪ জন নিহত হোৱাৰ লগতে ১২ জন লোক গুৰুতৰভাৱে আহত হয়৷ ঘটনাটো কোতৱালী আৰক্ষী থানাৰ পৰা মাত্ৰ ১০০ মিটাৰ দূৰৰ এটা ঘৰত সংঘটিত হৈছিল। জানিব পৰা মতে যে ঘৰটোত বাৰুদ, ফটকা আৰু দেশীয় বোমা তৈয়াৰ কৰা হৈছিল। নিশা এটা এটাকৈ হোৱা ধাৰাবাহিক বিস্ফোৰণৰ ফলত সমগ্ৰ চহৰখন কঁপি উঠে। বিস্ফোৰণটো ইমান শক্তিশালী আছিল যে ই দুটাৰ পৰা তিনিটা ঘৰ ক্ষতিগ্ৰস্ত কৰিছিল। ভাগলপুৰ বোমা বিস্ফোৰণৰ ঘটনাত চাৰিজন লোক নিহত আৰু ১২ জন গুৰুতৰভাৱে আহত হোৱাটো নিশ্চিত কৰা হৈছে। ঘটনা সন্দৰ্ভত অৱগত হোৱাৰ পাছত ডিআইজি সুজিত কুমাৰ, ডিআইজি সুব্ৰত কুমাৰ সেন, এছএছপি বাবু ৰামৰ লগতে আৰক্ষী বাহিনী ঘটনাস্থলীত উপস্থিত হয় আৰু ঘটনাস্থলীৰ বুজ লয়। ঘটনাস্থলীত আৱদ্ধ লোকসকলক উদ্ধাৰ কৰি দুখন জেচিবিৰ সহায়ত ধ্বংসাৱশেষ পৰিষ্কাৰ কৰাৰ কাম দ্ৰুত গতিত আৰম্ভ কৰা হৈছিল। আহত লোকসকলক ভাগলপুৰৰ জেএলএন চিকিৎসালয় মায়াগঞ্জত ভৰ্তি কৰোৱা হৈছে। বিস্ফোৰণত মৃত্যুৰ সংখ্যা বৃদ্ধি পাব পাৰে বুলিও প্ৰশাসনে সন্দেহ প্ৰকাশ কৰিছে। ঘটনা সন্দৰ্ভত স্থানীয় যুৱক ইউছুফে অভিযোগ কৰে যে ঘটনা সংঘটিত হোৱা ঘৰৰ লোকসকলে বোমা তৈয়াৰ কৰাৰ ব্যৱসায় তৈয়াৰ কৰি আহিছিল। আৰক্ষীৰ দলটোৱে ফটকা প্ৰস্তুত কৰা দুজন লোকক জিম্মাত লৈছে যদিও এই সন্দৰ্ভত এতিয়ালৈকে কোনো তথ্য প্ৰকাশ কৰা নাই৷